Devocioni dhe kulti marian, në prag të të Ngjiturit të Zojës në Qiell

R. SH. - Vatikan

Kairo: Të krishterët koptë ortodoksë në mbarë botën po e jetojnë me devocion të thellë pesëmbëdhjetëditëshin e “agjërimit të Virgjërës Mari”- duke u lutur sipas ndjeteve të Patrikut të tyre, Tawadros II edhe për manastiret e Egjiptit, në çastet e vështira që po kalon e gjithë bashkësia murgare, pas vdekjes së ipeshkvit-abat Epiphanios, vrarë në manastirin e Shën Makarios, mëngjesin e 29 korrikut. Koha e lutjes dhe e agjërimit do të përfundojë më 22 gusht, datë në të cilën Kisha kopto-ortodokse kremton “Të Ngjiturit e Marisë në qiell”, ndërsa disa Kisha të tjera ortodokse si dhe Kisha katolike e kremtojnë këtë festë, kulm i të gjitha festave të verës, më 15 gusht e tani po vijojnë pikërisht pesëmbëdhjetëditëshin e përgatitjes për Solemnitetin.

Adis Abeba: Edhe Etiopia përgatitet për festën e Përgjumjes së Zojës së Bekuar. Patriku Mathias I dhe Sinodi i Kishës ortodokse Tewahedo, në Etiopi, vijojnë 16 ditët e agjërimit  e të lutjes, që i paraprijnë solemnitetit liturgjik të Përgjumjes së Shën Marisë, Nënë e Zotit, festë, të cilën edhe Etiopia e kremton më 15 gusht. Lypin dhuratën e paqes e të pajtimit etiopët, nga Zoja e Ngjitur në Qiell, pas dhunës me karakter etnik të ditëve të kaluara, që shkaktuan 30 viktima. Pikërisht Kisha ortodokse etiope e pagoi më shtrenjtë spiralen e dhunës: sipas njoftimeve të mediave vendase, më se shtatë kisha ortodokse u sulmuan dhe u dogjën e, në valën e dhunës me karakter etnik, humbën jetën edhe gjashtë meshtarë e besimtarë.

Irak, Karamles: Qindra të krishterë irakianë morën pjesë, mbrëmjen e 6 gushtit, në një procesion, që përshkoi rrugët e Karameles, qytezë e Rrafshit të Ninives, e banuar nga të krishterët. Në prag të festës së madhe të të Ngjiturit të Zojës në Qiell, deshën të kujtojnë ngjarjet që, natën ndërmjet  6 e 7 gushtit, i detyruan me dhjetra mijëra të krishterë të largohen nga qyteti dhe fshtatrat e Rrafshit të Ninives, të ndjekur nga milicët xhihadistë të Shtetit të vetëshpallur Islamik(Daesh). E sidomos, rikthimin!