Vizita e ipeshkvit të Cremonës në famullinë e Pukës, dioqezë të Sapës
R.SH. - Vatikan
Vizita e ipeshkvit italian të dioqezës së Cremonës, imzot Napolioni në dioqezën e Sapës, nga 20-24 korrik 2018. Gjatë kësaj vizite, ipeshkvi Napolioni u prit ipeshkvi i Sapës, imzot Simon Kulli e nga misionari i tij dom Giovanni Fiocchi.
Mysafiri pati rastin për të njohur nga afër realitetin shoqëror e kishtar të kësaj zone, si dhe misionin që Kisha e Sapës e çon përpara falë punës meshtarit “fidei donum” të Cremonës, dom Giovanni Fiocchi, famullitari i famullisë Kishtare “Zoja e Papërlyer” në Pukë, ku vepron që prej 20 vitesh, si dhe të Motrave Misionare të Dashurisë –Motrave të Shën Nënë Terezës e të shumë tjerëve. Po më hollësisht mbi këtë vizitë vëllezërore dhe bashkëpunimin ndërmjet dy Kishave dioqezane, nga Vau-Dejës, të ndjekim shërbimin e Violeta Marashit..
IPESHKVI I CREMONËS MONS. ANTONIO NAPOLIONI VIZITON DIOQEZËN E SAPËS
Nga data 20-24 korrik 2018, Ipeshkvi i Cremonës – Itali, Mons. Antonio Napolioni, bëri një vizitë zyrtare në Dioqezën e Sapës. Ai është pritur nga misionari “fidei donum”, dom Giovanni Fiocchi, famullitari i famullisë “Zoja e Papërlyer” Pukë, që prej 20 vitesh. Në vizitën e tij 4 ditore, Mons. Napolioni i shoqëruar nga drejtori i qendrës misionare dom Maurizio Ghilardi ka vizituar kryesisht famullinë e Pukës dhe fshatrat përreth, duke më parë më nga afër realitetin dhe gjendjen pastorale të kësaj zone. Së bashku me famullitarin dom Giovanni, Ipeshkvi ka kryesuar edhe kremtimet e meshës Shenjte në disa famulli, ku ka patur rastin të takohet edhe me besimtarët e thjeshtë dhe të përvuajtur të Pukës. Po ashtu, mons. Antonio ka zhvilluar një vizitë edhe në bashkësinë e motrave të “Shën Nënë Terezes” në Pukë, të cilat së bashku me dom Giovannin zhvillojnë misionin e dashurisë dhe të bamirësisë në këtë vend.
Ipeshkvi i Cremonës, është pritur edhe në rezidencën e Ipeshkvisë së Sapës, nga Imzot Simon Kulli. Gjatë vizitës së ngrohtë dhe miqësore, mes të tjerave dy ipeshkvinjtë kanë diskutuar rreth vazhdimësisë së misionit dhe bashkëpunimit të mëtejshëm mes dy dioqezave si motra. Një falenderim i përzemërt dhe mirënjohje e veçantë, Imzot Simoni ka bërë për dom Giovannin, i cili ka hapur misionin e parë në Pukë, dhe që prej 20 vitesh ka shërbyer në këto zona, pa marrë parasysh kushtet dhe vështirësitë me të cilat është përballur.
Gjithashtu, gjatë ditëve të qëndrimit në Sapë, ipeshkvi i Cremonës ka vizituar Caritasin Dioqezan, Shtëpinë e Bamirësisë si dhe qendrën e Lutjes në Nënshat, Kuvendin Karmelitan.
