Ukrainë, Putin njeh republikat separatiste. Sanksione nga SHBA-të
R.SH. – Vatikan
Duke i folur kombit të hënën në mbrëmje (21 shkurt), presidenti rus Vladimir Putin nënshkroi një dekret, me të cilin Moska njeh republikat separatiste ukrainase të Luganskut dhe Donetskut, në Donbas. Kreu i Kremlinit dërgoi edhe forca të armatosura në rajon, zyrtarisht për të siguruar paqen. Përgjigje e qartë nga Kievi: nuk do të shesim asnjë metër të vendit tonë.
Fjalimi i presidentit Putin
“Ukraina është pjesë e historisë, kulturës dhe fesë së Rusisë”, pohoi Putin para kombit. “Situata në Donbas”, vazhdoi ai, “është përsëri kritike” e nevojiten vendime urgjente. Prandaj, pas kërkesave të Dumës dhe të anëtarëve të Këshillit të Sigurimit të Federatës Ruse, presidenti njohu zyrtarisht pavarësinë e dy republikave separatiste. Kreu i Kremlinit vuri në dukje se në dokumentet zyrtare të Aleancës Atlantike, Rusia përshkruhet si kërcënim kryesor për sigurinë. SHBA-të dhe NATO-ja, nënvizoi ai, veprojnë duke e konsideruar Ukrainën si teatër të aksioneve të mundshme ushtarake. “Sistemet ukrainase të komandimit”, pohoi Putin, “tashmë janë integruar me ato të Paktit Atlantik”.
Sanksionet e para nga SHBA-të
Ndër reagimet e para pas fjalimit të presidentit Putin, SHBA-të dhe presidenti i tyre Joe Biden zgjodhën rrugën e proporcionalitetit, duke vendosur sanksione vetëm kundër dy provincave separatiste ukrainase. Kjo u bë për të mos prishur aleancën me evropianët më të kujdesshëm, që varen nga furnizimet me gazin rus, por edhe për të mbajtur hapur dritaren e dialogut diplomatik, që ndoshta, mund të rifillojë me takimin e mundshëm të së enjtes ndërmjet Sekretarit të Shtetit amerikan Blinken dhe Ministrit të jashtëm rus Lavrov. Fjalimi i presidentit Putin u interpretua si kërcënim për të pushtuar gjithë Ukrainën, por ndihet edhe shqetësimi për vendet e ish-Traktatit të Varshavës, që tani bëjnë pjesë në NATO, prandaj i nënshtrohen nenit 5, i cili përcakton detyrimin e mbrojtjes reciproke.
Papa: “lufta është çmenduri”
Gjithë bashkësia ndërkombëtare po punon për t’i bërë ballë kësaj faze të re të krizës në Ukrainë. “Rreziku i një konflikti është real dhe duhet të parandalohet me çdo kusht”, deklaroi zv.sekretarja e përgjithshme e Kombeve të Bashkuara, Rosemary DiCarlo, në hapjen e mbledhjes së Këshillit të Sigurimit të OKB-së, gjatë natës. Mbetet një hapësirë për dialog, për të cilën Papa ka bërë disa thirrje javët e fundit. Edhe në Engjëllin e Tënzot të së dielës së kaluar, Françesku shprehu trishtimin e madh për ato raste kur “njerëz dhe popuj, krenarë që janë të krishterë, i shohin të tjerët si armiq dhe mendojnë t’u shpallin luftë!”. Jo më larg se 26 janari, Papa pati caktuar një ditë të veçantë lutjeje për paqen në Ukrainë.
