Urime, të gjitha Nënave të botës!
R. SH. - Vatikan
“Nuk jemi jetimë! Të gjithë e kemi një Nënë! Zojën, Kishën, Nënat tona! Nuk jemi jetimë! Jemi bij të Marisë, të Kishës, të Nënave tona”. Këto fjalë, shqiptuar nga Papa në audiencën e përgjithshme të 7 janarit 2015, na kujtojnë se feja është dhuratë e Shpirtit Shenjt e transmetuar veçanërisht nga nënat!
E fjalët e Papës shoqërohen edhe me urimet e Familjes së Vatican News e të Radio Vatikanit drejtuar të gjitha nënave, në të gjitha gjuhët!
“Të dashura Nëna - pati shtuar Papa gjatë audiencës së përgjithshme - faleminderit, faleminderit për çka jeni në familje e për çka i jepni Kishës e botës”.
Nëna, faleminderit për dhuratën e jetës e të fesë
Janë Nënat ato, që na e dhurojnë jetën dhe na e transmetojnë fenë. Feja është dhuratë. Nuk mund të studiohet. Studiohen gjërat e fesë, por me studim nuk mund të arrish kurrë tek feja. Feja është dhuratë e Shpirtit Shenjt, është dhanti, që shkon përtej çdo përgatitjeje. E kjo dhuratë kalon përmes prehërit të nënave, punës së bukur të tyre në gjirin e familjes! Po pse feja transmetohet veçanërisht nga gratë? Thjesht sepse ajo, që na e solli Jezusin, ishte grua. Ai deshi të ketë një nënë: ndaj edhe dhurata e fesë kalon nëpërmjet nënave, si Jezusi nëpër Marinë. Përmes nënave, që jo vetëm na e dhurojnë fenë, por edhe na e ruajnë që të mos zbehet kurrë, e na e ushqejnë, që të na shoqërojë gjithë jetën!
Faleminderit Nëna! E gëzuar festën!