Irak: “Kush ishte iraniani Qassem Soleimani, i vrarë në Bagdad nga SHBA-të”
R. SH. - Vatikan
Qassem Soleimani, 62 vjeç, prej më se 20 vjetësh ishte në krye të forcave al Quds, trupë speciale e të ashtuquajturve Rojet e revolucionit islamik në Iran. Gjenerali iranian u vra gjatë një sulmi, organizuar natën në Bagdad nga SHBA-të. Soleimani ishte figurë gati legjendare në Lindjen e Mesme: gjeneral, strateg, me ambicie politike, që shihej shumë shpesh përkrah me Kryeprijësin e Iranit, ajatollah Ali Khamenei, ndonëse lëvizte gjithnjë në hije. Konsiderohej arkitekt i pranisë ushtarake në Siri, për të mbajtur mbi fron Bashar al Assadin, dhe i luftës së Daesh; njeriu, që çimentoi ndikimin e milicive shiite në Irak, si dhe mbështetjen e hezbollahëve në Liban.
Soleimani shkroi, në jetëshkrimin e tij, se kish lindur më Rabor, qytet në Iranin lindor e se, në moshën 13 vjeçare, u detyrua të emigrojë në një qytet të afërt, ku punoi në qeverinë e Scià, për të paguar borxhet e babait të tij. Kur ra mbreti, në vitin 1979, Soleimani, që bënte pjesë në qeverinë klerikale të Ayatollah Ruhollah Khomeinit, u bashkua me Rojet revolucionare, forcë paraushtarake, e themeluar për t’i prerë rrugën grushtit të shtetit kundër Republikës së sapodeklaruar Islamike.
Irani, Vend me shumicë shiite, ushtroi një ndikim të jashtëzakonshëm mbi Irakun, që kur u vra rais Saddam Huseini, që ishte sunit. Nga tetori u trondit thellë nga protestat kundër-qeveritare e kundër Iranit. Soleimani konsiderohej si longa manus (dora e gjatë), që vepronte pas kurrizit të qeverisë; e pikërisht që ta ndihmonte qeverinë për ta vënë situatën nën kontroll, kishte shkuar javët e fundit në Irak.
Teherani konfirmoi vdekjen e Soleimanit, “martir i një sulmi amerikan në aeroportin e Bagdadit këtë mëngjes” në një deklaratë lexuar nga Rojet e revolucionit islamik në televizionin e Shtetit iranian.
Siç lexojmë në Guardian, në një letër të vitit 2008 drejtuar sekretarit të mbrojtjes së SHBA-ve, gjenerali David Petraeus, ish drejtor i Cia-s, e përshkruante Soleimanin si “Njeri me të vërtetë i mbrapshtë”. Tetëmbëdhjetë muaj para vdekjes, Soleimani e paralajmëroi publikisht presidentin e SHBA-ve, Donal Trump: “Zoti Trump, lojtar bixhozi, po jua them një fjalë: ne jemi shumë më afër jush, sesa mund ta mendoni. Do ta filloni luftën, por për ta përfunduar, do ta përfundojmë ne”.
Vdekja e Soleimanit ka shumë rrezik të shkaktojë shkallëzimin e konfliktit, që vijon prej shumë kohe nëndheshëm ndërmjet SHBA-ve dhe Iranit e kohët e fundit shpërtheu me sulmin mbi ambasadën amerikane nga ana e milicëve filo-iranianë, pas sulmeve amerikane pikërisht kundër një milicie tjetër, asaj Kataeb Hezbollah, mbështetur nga Teherani.