Mesazhi Festiv i Karlit të Anglisë për të krishterët e persekutuar

R. SH. - Vatikan

Në mbarë botën vijon të kremtohet solemniteti i Krishtlindjes, e njëkohësisht, në të katër anët e globit vijon edhe martirizmi e diskriminimi i ndjekësve të Krishtit. E pikërisht atyre u drejtohet mesazhi-video, që princi Karl i Anglisë e realizoi, së bashku me Fondacionin “Ndihmë për Kishën që Vuan”. “Ka rëndësi jetike - pohon - t’i kujtosh të gjithë ata, që pësojnë persekutime në zonat e fesë së tyre të krishterë”.

Krishti i karbonizuar i Sri Lankës

Në video Karli i Anglisë flet për takimet e tij  të kohëve të fundit me një meshtar e një rregulltare. I pari, shpjegon, “ndihmon, në Sri Lanka,  ata që u plagosën rëndë gjatë sulmeve barbare të këtij viti në Kisha, gjatë kremtimit të Pashkëve, më 21 prillin e kaluar”. Viktima të sulmeve antikristiane ishin  260 të vdekur e 500 të plagosur. “E ky, për fat të keq, nuk është rast i izoluar - nënvizon Princi Karl - i cili  kujton, më pas, fjalët e rregulltares kushtuar situatës në Siri, ku me guxim mbinjerëzor e në kushte  të pamundshme, vijon t’u japë ndihmë vendimtare të krishterëve dhe të gjithë atyre, që ikin nga dhuna e nga vdekja. Rregulltarja siriane, të cilën e takova - kujton - më dhuroi Kokën e Krishtit të Kryqëzuar, gdhendur në dru, të karbonizuar, shpëtuar nga njëra prej kishave të bombarduara  të Halebit”.

Të krishterët persekutohen në 20 vende të botës

Bota feston – e bota persekutohet. Bota vallëzon rreth Bredhave vezullues, e bota dëshmon se Krishti lindi, se predikoi paqen, se u kryqëzua për shpëtimin e njerëzimit - duke u kryqëzuar si Ai, në emër të tij e të shpëtimit të mbarë njerëzimit, edhe të asaj pjese, që sot vallëzon nën bredhat e vezullues!

Karli citon Raportin e tetorit të kaluar të Ndihmë për Kishën që Vuan, ku  lexohet se vetëm gjatë një dhjetëvjeçari dy të tretat e bashkësive të  krishtera kanë ikur nga Siria, ndërsa në Irak, bashkësitë e krishtera u reduktuan deri  në 90% në një brezni të vetme.

Prej këndej, thirrja e Princit të Anglisë, të bëjmë me vendosmëri gjithçka mund të bëhet, “që krishterimi të mos zhduket nga Toka Shenjte”.