Autoriteti i Mediave Audiovizive nga Shqipëria për vizitë në Radio Vatikan
R.SH. - Vatikan
Autoriteti i Mediave Audiovizive, (AMA), të Shqipërisë me kryetarin Gentian Sala, zëvendëskryetarin Sami Nezaj, drejtorin e programeve Arben Muka dhe anëtarin e bordit Agron Gjekmarkaj vizituan redaksinë shqipe të Radio Vatikanit.
Kujtojmë se Autoriteti i Mediave Audiovizive (AMA) është autoriteti rregullator në fushën e shërbimeve të transmetimeve audio e audiovizive dhe shërbimeve të tjera mbështetëse në territorin e Republikës së Shqipërisë, me statusin e personit juridik publik, të pavarur, privat.
Gjatë takimit të përzemërt që delegacioni i Autoriteti i Mediave Audiovizive (AMA) pati me redaksinë shqipe të RV, mes tjerash, u fol për funksionin dhe shërbimin e këtij institucioni në fushën e mediave publike e private në Shqipëri. Gjithashtu u fol për realitetin që kanë sot mediat audiovizive në Shqipëri, për rolin dhe kontributin e tyre në shoqërinë e sotme shqiptare, përfshirë edhe mediat e komuniteteve fetare, të cilat, sipas AMA, janë një vlerë e shtuar në tregun e mediave. U fol edhe për kodin e etikës së informacionit në media.
AMA si Rregullator ka për mision të sigurojë që të gjitha shërbimet audiovizve të përmbushin sa më mirë nevojat e qytetarëve të Republikës së Shqipërisë, duke respektuar gjuhën dhe larminë e traditave, besimet fetare, kulturën dhe moralin e qytetarëve, mbështetur në vlerat demokratike të përcaktuara në kushtetutë, veçanërisht në lirinë e shprehjes dhe të medias. AMA në ushtrimin e funksioneve të veta kujdeset në mënyrë specifike për respektimin e të drejtave, interesave dhe kërkesave morale e ligjore për mbrojtjen e të miturve.
Mbi këto e tjera, në mikrofonin e redaksisë shqipe të Vatican News – Radio Vatikanit të dëgjojmë kryetarin i AMA, Gentian Sala, zëvendëskryetarin Sami Nezaj, drejtorin e programeve Arben Muka, Arben Muka dhe anëtarin e borit Agron Gjekmarkaj....