Videokatekizmi, vepër që flet gjuhën e sotme, realizuar nga Gjon Kolndrekaj
R.SH. - Vatikan
Fjalë, imazhe, tinguj dhe ngjyra për të arritur në zemrën e burrave dhe grave të shoqërisë sonë bashkëkohore, në këtë kohë kaq të ethshme, kaotike dhe të hutuar. Ky është synimi i Videokatekizmit të Kishës Katolike, paraqitur dje në Filmotekën e Vatikanit, i cili u realizua nga regjisori shqiptar Gjon Kolndrekaj.
Videokatekizmi: doktrina e krishterë nga letra në film dhe në sistemin dixhital
Një vepër origjinale, imponuese, në të cilën takohen dija e urtia e Etërve të Kishës dhe teknologjia më e avancuar me qëllim për ta bërë kuptueshme dhe për ta përhapur bukurinë e Fesë të krishterë. Pesë vjet punë, me xhirime e filmime në mbarë botën, 4000 lexues të shtatëdhjetë kombësive të ndryshme, janë vetëm disa nga të dhënat që na bëjnë të kuptojmë punën e madhe që solli në dritë një film 25-orësh, të ndarë në 46 kapituj prej rreth 30 minutash secili.
Katër janë pjesët nga të cilat përbëhet videokatekizmi: Rrëfimi i Fesë; Kremtimi i Misterit të Krishterë; Jeta në Krishtin; Lutja në Jetën e Krishterë. Gjithashtu është përpiluar versioni i Audio-Librit për njerëzit e verbër.
Videokatekizmi i Kishës Katolike, sipas Imzot Fisichella, "është përgjigja më e mirë dhe më e azhurnuar ndaj pyetjes se si mediat mund t'i shërbejnë ungjillëzimit të ri". Sepse "e kemi për detyrë të flasim gjuhën e atyre që na dëgjojnë - tha Paolo Ruffini, Prefekt i Dikasterit të Vatikanit për Komunikim - dhe rrjedhimisht, gjuhën e kohës sonë. Një detyrim i rëndësishëm - vazhdon Ruffini – e një mision i vështirë që na sfidon".
Në prezantimin e djeshëm, eleganca e regjisorit kosovar Gjon Kolndrekaj, tashmë autor i njohur edhe i filmit dokumentar "Matteo Ricci. Një jezuit në mbretërinë e dragoit " e të shumë veprave tjera, u shpreh në falënderimet e tij "për mbështetjen dhe durimin që patën "ata të cilën më shoqëruan në këtë ndërmarrje" aspak të lehtë, sepse - shpjegon Gjon Kolndrekaj – të rrëfesh historinë e Zotit me njerëzit nuk është aspak e lehtë, ashtu siç na e paraqet përmbajtja e Katekizmit të Kishës katolike, posaçërisht nëse kjo histori e Zotit me njerëzimin paraqitet përmes gjuhës kinematografike, prandaj ne vetëm sa i jemi përafruar historisë sonë, kemi provuar sadopak të thellohemi në të, për të qenë në gjendje ta kuptojmë sa më mirë historinë, do të thotë dashurinë e pakufishme të Zotit me njerëzimin". Sipas regjisorit shqiptar, Katekizmi i Kishës katolike nuk u takon vetëm besimtarëve, po është një thesar i çmuar për mbarë njerëzimin. Të marrim si shembull Dhjetë Urdhërimet e Tënzot e të përshkojmë vlerën që kanë për njerëzit e të gjitha kombeve e feve nga hebraizmit e deri te krishterimi etj”.
Nga ndërhyrjet e ndryshme, gjatë prezantimit të Videokatekizmit, moderuar nga drejtori editorial i Departamentit të Selisë së Shenjtë për Komunikim, Andrea Tornielli, përmendim atë të Kryetarit të Këshillit Papnor për Nxitjen e Ungjillëzimit të Ri, imzot Rino Fisichella dhe atë të Drejtorit të Shtëpisë Botuese e Librarisë së Vatikanit, Fra Giulio Cesareo.
Struktura e katekizmit, një video-veprën e Gjon Kolndrekajt, vjen nga përvoja e katekumenatit të Kishës së shekujve të parë, e merr elementet themelore që e ndihmojnë njeriun të njihet me përmbajtjen e mësimit të krishterë e edhe të bëhet i krishterë, e këto elemente janë: feja, urdhërimet e Tënzot, lutja Ati Ynë, Besojma, Sakramentet e tj.
“Edhe në Romë, ashtu si kudo në botë, janë shumë njerëzit që ende nuk e kanë takuar Zotin Jezus: atyre – thotë regjisori Kolndrekaj – u drejtohet video-katekizmi i Kishës katolike që kam realizuar. Për të gjithë këtë – pohon Gjon Kolndrekaj - është i nevojshëm një edukim i brendësisë së shpirtit”. Pra, Videokatekizmi është një vepër multimediale televizive, realizuar në pesë-gjashte vjet punë për të realizuar 25 orë filmimi ndarë në 46 episode, me 800 orë xhirime, në 16.000 vende (location) në 70 vende të botës, me pjesëmarrjen e 60,000 njerëzve, 3.000 lexuesve të 200 profesioneve të ndryshme në 37 gjuhë të ndryshme të botës. Po më tepër, në mikrofonin e redaksisë shqipe të Vatican News – Radio Vatikanit, ta dëgjojmë regjisorin kosovar Gjon Kolndrekaj...