Nëna është…
R. SH. - Vatika
Nё festёn e nёnёs, i kujtojmë me mirënjohje e përzemërsi të gjitha nënat. Dhe për të gjitha nënat tona të dashura, ato, që jetojnë me ne fizikisht, por edhe ato, që jetojnë me ne shpirtërisht, është lutja jonё e përzemërt, janё urimet tona: qё tё gjejnë ngushëllim në frytin e amësisë së tyre, Zoti i bekoftë tё gjitha nёnat, e qofshin të bekuara dhe të dashura nga të gjithë.
Nënës sё vetme, Nënës sё nënave, Virgjërës Mari ia besojmë të gjitha nënat shqiptare e tё mbarë botës. Zoti i bekoftë të gjitha. Ato ia besojmë Nënës së Jezusit. E Zoja e Bekuar, së cilës i kushtohet ky muaj, i ruajtë. Me këto fjalë u shprehim urimet e përgëzimet tona të gjitha nënave!.
Nëna nuk është
një grumbull rrudhash e thinjash,
për t’u harruar në skutë.
Nuk është kosh,
për të hedhur fundërrinat e kohës së humbur!
S’ është fjalë e kotë
që shuhet në shtjellë kohe
e në harresë…
Nëna është heshtje e gatshme
për të mbledhur fjalët e fshehta;
Është lule, që lulëzon edhe pa ujë;
mjafton vetëm një pikë
e ajo jeton në amshim!
Nëna, pizhamë e pastër, erëmirë
tek këmbët e krevatit.
Dorë, që xhepat
t’i mbush me dashuri.
Shikim me symbyllur
që shtron
çarçafat e bardhë si dëbora…
Nëna është lot i terun;
pjata përplot mbi sofër
edhe natën vonë!
Nëna është zemra jote
që rri në shtëpi!
E sidomos:
është Zoja e Bekuar
mbi kokën e krevatit!