Atë Gjergj Fishta: Zemrës së shugurueshme së Zojës së Bekueme

R.SH. - Vatikan

Zemrës së shugurueshme së Zojës së Bekueme.

¹ O Zêmra e Zojës, kû mshrira,
Posë Njat qi rruzullimin
Sundon e pakthellimin,
Má ambel n’qiellë shkelxen,
² Ti Zêmer Nanet t’ambel
Jé p’r atë qi s’e lodhë mkati;
Prej Teje kurr i ngrati
Fajtuer pa gzim nuk kthen.
³ T’nderon Tý qiella e toka,
T’nderon Tý vetë yt Bír:
Ti jé zamaku i dlír,
Qi gjarpni s’e helmoi.
⁴ Prej gjakut t’and t’kulluem
Zêmra e Njatij u mishue,
Qi pezull tue peshue
M’kryq deken e pushtoi.
⁵ Pra t’falmi, o Zêmra e dashtun,
S’cillës Ejlli n’qiellë e nieri
T’biejn para n’gjûj e i mjeri
Ndihmen t’a lypë me lot.
⁶ Merr zêmrat t’ona, o Virgjin,
Ti mundesh me i pertrî;
Dergojau njatë dashtní
Qi zêmren e ké plot.
⁷ O Nanë, pre’ Zêmres s’ate
Gzim Zêmra e Krishtit ká
Dý zêmra kurr pergjá
Mâ fort n’dashtni nuk kan.
⁸ Si mundmi me t’u falun
Si duhet na Tý, o Zêmer,
Na qi kem’ qitë nen thémer
Gjakun e Birit t’an’ ?
⁹ O bijt e mi ktû eni:
(Na thrret kshtû e lumja Zojë),
Kush t’m thrrase mue n’nevojë
Un ndihmen kurr s’i a ndal’.
¹⁰ Rreth meje t’tanë shterngohi,
Nen hije t’ême eni,
Pse n’ç do rrezik qi t’keni,
Un zot gjithmonë ju dal.

Atë Gjergj Fishta OFM; ‘Vallja e Parrizit’, fq. 107-109