Zelanda e Re: sulmohen dy xhami. Dhjetra të vdekur
R. SH. - Vatikan
Të paktën 40, të vdekurit e 50, të plagosurit, sipas mediave vendase. Këto, numrat e ditës tragjike, të cilën kryeministrja neozelandeze, zonja Ardern, e quajti “dita më e zezë e historisë së vendit”. Policia, që gjeti lëndë shpërthyese të ngjitura ndër auto, kërkon të mos transmetohet videoja e sulmit, e postuar në Facebook. Po bëhen përpjekje për të shlyer çdo variant. Regjistrimi i atentatit është vepër e njërit nga atentatorët, botuar në profilin e tij në rrjetet shoqërore: një racist i bardhë, që vendosi ta godasë Zelandën e Re, për t’i treguar gjithë botës se emigracioni në masë ka arritur edhe në skajet më të largëta. Atentati i dyfishtë u realizua nga i njëjti grup prej katër vetësh, armatosur me automatikë, në orën 13.00 me orën vendase, 3 e natës, me tonën. Atentatori, që e regjistroi sulmin, hyri i pari në xhami, vrau disa vetë e pastaj doli jashtë për të marrë muinicione të tjera për automatikun e tij të zbrazur. E, si e mbushi, vijoi të shtënat mbi besimtarët. Pastaj nisi sulmi mbi xhaminë tjetër. Sipas kryeministrit australian, Morrison, njëri nga vrasësit është australian i së djathtës ekstreme.
Lutja dhe solidarieti i ipeshkvijve katolikë, për bashkësinë myslimane
Menjëherë pas dy atentateve të tmerrshme, ipeshkvijtë katolikë të Zelandës së Re i dërguan një mesazh “besimtarëve të dashur të bashkësisë myslimane neozelandeze të Christchurch, për t’u shprehur solidaritetin e tyre përballë kësaj dhune si dhe për t’i siguruar për lutjen e tyre. “Jemi thellësisht të vetëdijshëm për marrëdhëniet tona të mira me islamikët e kësaj toke - shkruajnë ipeshkvijtë - e po aq edhe për faktin se kjo ndodhi në një vend e në një kohë lutjeje. Në këto çaste kaq të trishtuara, plot me dhimbje për njerëzit e vrarë e të plagosur, zemra jonë është pranë tyre, pranë familjeve të tyre dhe bashkësisë në përgjithësi. ‘Paqe, Salaam!’”.