Cop24 mbi klimën: një adoleshente suedeze kundër mungesës së të mëdhenjve të botës
R.SH. - Vatikan
Greta Thunberg, një 15-vjeçare suedeze, që çdo javë largohet nga shkolla për të protestuar kundër apatisë së politikanëve në ndalimin e pasojave të ngrohjes globale, i quan krerët botërorë, që e kanë injoruar krejtësisht Takimin Botëror mbi Klimën në Poloni, “njerëz të papërgjegjshëm”.
Adoleshentja shkoi në Katowice të Polonisë, në fillim të punimeve të Cop24-ës, që do të vijojnë për dy javë, deri më 14 dhjetor. Foli para disa krerëve të shteteve të pranishme në Konferencë e pastaj, në një intervistë me agjencinë e lajmeve Associated Press, 15-vjeçarja denoncoi mungesën e liderëve si presidenti amerikan Donald Trump dhe kancelarja gjermane Angela Merkel. Kjo “tregon se kujt i japin përparësi”, ngriti zërin Greta, e cila proteston që prej muajsh për çështjen e klimës.
Ҫdo të premte, ajo lë shkollën e shkon para parlamentit të Stokholmit, në përpjekjen për të sensibilizuar politikanët dhe shoqërinë. “Në të ardhmen – tha adoleshentja për liderët jo të pranishëm në Katowice – do t’i kthejmë sytë pas e do të qeshim me ta, ose do t’i urrejmë”. Aktivizmi i Greta Thunberg ka frymëzuar edhe mijëra studentë në të gjithë botën, deri në Australi.