Ura e shembur e Gjenovës Ura e shembur e Gjenovës 

Dy shqiptarë humbin jetën në tragjedinë e Gjenovës

Një djalë nga Durrësi e një nga Shkodra, ndër viktimat e tragjedisë së Gjenovës, ku dje u shemb ura Morandi.

R.SH. - Vatikan

Lajmi, për të cilin u fol dje, fatkeqësisht, është i vërtetë. Dy shqiptarë kanë humbur jetën në tragjedinë e Gjenovës, në Itali, ku u shemb ura Morandi, duke shkaktuar rreth 40 viktima e shumë të plagosur, në një bilanc që rritet vazhdimisht.

Konfirmimi i ambasadës së Shqipërisë në Itali

         Ambasada e Shqipërisë në Itali, duke cituar Ministrinë e jashtme dhe atë të brendshme italiane, konfirmon vdekjen e dy shtetasve shqiptarë, Marjus Djerri dhe Admir Bokrina. Ambasadorja Anila Bitri i mori në telefon familjarët për ngushëllime dhe u ofroi ndihmën e shtetit shqiptar, në këtë çast kaq të rëndë.

Kontaktet për shqiptarët

         Përmes Konsullatës në Milano, ambasada e ndjek hap pas hapi gjendjen dhe është e gatshme t’u përgjigjet kërkesave për asistencë. Dy, numrat e telefonit, ku mund të pyesin shqiptarët: +39 3420498192; +39 3497834666.

Gjendja aktuale në Gjenova

         Ndërkaq, në qytetin e Gjenovës, skuadrat e ndihmës së shpejtë vijojnë punën për të nxjerrë njerëzit nga rrënojat. Prokuroria ka filluar hetimet për të zbuluar shkaqet e shembjes së urës, përuruar në vitin 1967. Sipas prokurorit të Gjenovës, duhen shqyrtuar të gjitha dokumentet e ndërtimit e të mirëmbajtjes e sidomos, pohimet e bëra në të kaluarën mbi qëndrueshmërinë e urës. Për shembull, në vitin 2012, dikush pati thënë se ura paraqiste një strukturë, që do të shembej pas 10 vjetësh.

Hamendjet për rënien e urës

         Ura u shemb në mesditën e djeshme, duke tërhequr pas vetës 100 metra me makina e kamionë. Hipotezat e para flasin, ndoshta, për fundosje strukture. Në çastin e tragjedisë, në zonë binte shi me rrëshekë. Sipas disa dëshmitarëve, ura është goditur nga rrufeja. E ndërtuar nga inxhinjeri Riccardo Morandi, e përuruar në vitin 1967, ura zgjatej për 1.182 metra e mbështetej mbi tri shtylla betonarme, që arrinin në 90 metra lartësi. Njëra prej tyre u shemb. Ndërsa autoritetet italiane bëjnë kontrollet e rastit, për t’u shënuar fakti se punimet për ristrukturimin e urës, nisur në vitin 2016, përfunduan vetëm pak kohë më parë.

Lutje në të gjitha kishat e Gjenovës

         Sot, siç njoftoi që dje kryeipeshkvi metropolit i Gjenovës, kardinali Angelo Bagnasco, “në të gjitha kishat e qytetit, edhe në përkim me festën liturgjike të Zojës së Madhe, meshtarët iu lutën veçanërisht Shën Marisë Virgjër për viktimat. Nuk përjashtohet një funeral publik për të vdekurit, në katedralen e Shën Lorencit, por më parë duhet verifikuar identiteti dhe prejardhja e tyre e, natyrisht, duhen pyetur familjarët”.

15 gusht 2018, 13:23