Hebdomada Papae, o boletim em latim do Vatican News

“HEBDÓMADA PAPAE”

NOTÍTIAE VATICÁNAE LATÍNE RÉDDITAE

Die décimo mensis Maii Anno Sancto bismillésimo vicésimo quinto

TÍTULI

Die octávo mensis Máii Robértus Francíscus Sanctae Románae Ecclésiae Cardinális Prevost eléctus est Románus Póntifex et nomen sibi sumpsit Leónem Décimum Quartum.

Die séptimo mensis Máii, ántequam Concláve incoháret, Missa pro eligéndo Pontífice est celebráta.

Die Martis praetérito cardináles adhortántur ad pacem consequéndam.

Vos ex ánimo salútat Eugénius Murrali diligénter sermónem Latínum audiéntes.

NOTÍTIA 1

Leónem Décimum Quartum nomen sibi sumpsit Robértus Francíscus Prevost uti ducentésimus sexagésimus séptimus Epíscopus Romae. De novíssima Póntificis electióne res enárrat Rosárius Tronnolone:

Annúntio vobis gáudium magnum; habémus Papam: Eminentíssimum ac Reverendíssimum Dóminum, Dóminum ROBÉRTUM FRANCÍSCUM Sanctae Románae Ecclésiae Cardinálem PREVOST qui sibi nomen impósuit LEÓNEM DÉCIMUM QUARTUM.

Leo Décimus Quartus est Papa, cui commíssa est gubernátio Ecclésiae. Post núntium Cardinális protodiáconi Domínici Mamberti, ducentésimus sexagésimus séptimus succéssor Petri in conspéctum pópuli advénit e Pórticu Benedictiónum Basílicae Vaticánae. Prima eius verba ad acclamántem plebem et ad univérsum mundum fuérunt: «Pax vobíscum ómnibus! Fratres sororésque caríssimae, est haec prima salutátio Christi post resurrectiónem, Boni Pastóris qui vitam pósuit pro grege Dei. Étiam ego salutátio haec velim cor vestrum ingrediátur et famílias vestras omnésque hómines, ubicúmque sint, cunctósque pópulos et univérsum terrárum orbem attíngat: Pax vobíscum!». In sermóne suo grates et memória Francísci Papae, adhortátio ad ecclésiam missionáriam aedificándam pontes aedificántem, sancti Augustíni revocátio, salutátio dioecésis Chiclayénsis in Perúvia. Pax, diálogus, cáritas, synodálitas, iustítia: haec áliqua ex vocábulis, quae ex eius sermóne micárunt. Ante benedictiónem Urbi et Orbi in die Supplicatiónis Beátae Maríae Vírginis de Pompéiis, omnes christifidéles cohortátus est ad «Maríam Matrem nostram deprecándam».

Novus Póntifex, ex Órdine Sancti Augustíni, hora sexta et septem transáctis horae pártibus eléctus, die décimo quarto mensis Septémbris anno millésimo nongentésimo quinquagésimo quinto Chicágii in Illinoësia e Civitátibus Foederátis Américae Septentrionális natus est. Undeseptuagínta annos natus, die undevicésimo mensis Iúnii anno millésimo nongentésimo octogésimo secúndo présbyter ordinátus est, Epíscopus Chiclayénsis anno bismillésimo décimo quinto nominátus et in Consistório diéi tricésimi mensis Septémbris anno bismillésimo vicésimo tértio a Papa Francísco Cardinális creátus. Senténtia episcopális eius: In illo uno unum.

NOTÍTIA 2

Die Mercúrii praetérito, mane, Ioánnes Baptísta Re, cardinális decánus Missae pro eligéndo Pontífice praesédit, ántequam post merídiem enuntiarétur extra omnes ac purpuráti electóres in concláve congregaréntur. Refert Sílvia Guidi.

«Hic sumus Spíritus Sancti auxílium petitúri, eius lucem implorántes eiúsque virtútem, ut eligátur Póntifex cuius Ecclésia hominésque indígent his difficílibus implicatísque tempóribus»: quaedam sunt haec verba quae in illa celebratióne Decánus ante Concláve prótulit, qui electóres cardináles ac mundum de eventúra sollemnitáte mónuit. Idem cardinális áddidit ut «persónae considerátio prorsus deponerétur atque in mente cordéque Iesu Christi Deus et Ecclésiae hominúmque bonum solúmmodo servarétur». Ália eiúsdem cardinális verba: «Ecclésiae unitátem vóluit Christus, quod non sibi vult uniformitátem, sed sólidam artámque ex diversitáte communiónem, dúmmodo erga Evangélium fidélitas máneat».

NOTÍTIAE BREVÍSSIMAE

Die sexto mensis Máii in Conclávis pervigílio, congregáti cardináles animadvertérunt nullum esse infelíciter obtinéndae pacis progréssum. Iíque «veheménter sunt cohortáti inplicátas partes ut arma quam primum in perpétuum depónerent».

Ad finem ventum est. Ad próximam hebdómadam. Valéte.