Hebdomada Papae, o boletim em latim do Vatican News

    HEBDÓMADA PAPAE
                                                Notítiae Vaticánae Latíne rédditae
                   Die duodetricésimo mensis Ianuárii anno bismillésimo vicésimo tértio

(TÍTULI)

In papáli Sancti Petri Basílica Dei Verbi Domínicam celebrávit Francíscus Papa, quam litúrgicam actiónem abhinc quáttuor annos instítuit Ipse. Sua in cohortatióne necessitátem Idem memorávit Evangélii nuntiándi.
Die festo Conversiónis sancti Páuli vésperas celebrávit Póntifex, orans et omnes adhórtans, ut una simul magis ac magis operarémur ad plenam unitátem consequéndam, quam vóluit Iesus.
Francísci Pontíficis Núntius quinquagésimi séptimi Diéi mundiális Communicatiónum sociálium est éditus. Hortátur Ipse ex corde ad loquéndum, secúndum veritátem in caritáte.

Salútem plúrimam ómnibus vobis auscultántibus núntios, Latína lingua prolátos, comméndat Alexánder De Carolis.

(NOTÍTIAE PRAECÍPUAE)

Ab eius institutióne, anno bismillésimo undevicésimo, quartum Francíscus Papa Dei Verbi Domínicam celebrávit. In sollémni ritu, intra papálem Basílicam Sancti Petri acto, Póntifex decem láicis, ex váriis continéntibus oriúndis, lectórum et catechistárum ministérium cóntulit. Refert Mónia Parente.
Per homíliam imagínibus refértam, Francíscus Papa asseverávit hódie étiam úrgere Evangélium nuntiáre. Quod in Missa Dei Verbi Domínicae dixit, éfferens verbum hoc siléntio praeteríri non posse, at esse testándum. Quin immo Póntifex dixit Dei verbum lucem esse debére, laborántis cordis solácium, gládium vitam pertranseúntem. Litúrgicae celebratiónis témpore tres novos minístros lectóres instítuit Summus Póntifex, quibus Sacras Scriptúras trádidit. Posthac septem novos catechístas instítuit, quibus crucifíxum dedit, signum eórum ministérii. Decem hi láici ex Ásia, Európa, Américis et África adveniéntes ad Evangélium ex vita testándum sunt missi.

In papáli Basílica Sancti Páuli Extra Moenia Conversiónis sancti Páuli, géntium Apóstoli, festum, die Mercúrii quinto et vicésimo mensis Ianuárii, celebrávit Póntifex. Litúrgiae oecuménicae vesperárum témpore, ad finem addúxit Póntifex precatiónis hebdómadam pro christianórum unitáte. Audiámus Márium Galgano.
Una simul cum ecclesiárum christianárum váriis moderatóribus, orávit Póntifex ut Christi optátum adimplerétur, id est plena eius discipulórum únitas. In Basílica, in qua sancti Páuli Apóstoli exúviae servántur, Isaíae prophétae verba ob óculos habens, Francíscus affirmávit Deum pati propter contentiónes inter illos qui se christiános profiténtur. Porro palam bellum designávit quod pernicióse Ucraínam funéstat. Étenim, Póntifex illos notávit qui confirmári se séntiunt aut saltem potestátem a fide dari nímium pátriae stúdium, mores ódii in éxteras gentes, contémptum vexationémque in divérsos sustinéndi.

(NOTÍTIAE BREVÍSSIMAE)

Die festo diurnariórum patróni, sancti Francísci de Sales, Núntium evulgávit Summus Póntifex quinquagésimi séptimi diéi mundiális Communicatiónum sociálium. Hoc anno Pontíficis documéntum tale secum fert arguméntum: “Ex corde loqui. Secúndum veritátem in caritáte”. Véhemens est adhortátio ut in advérsum procedátur ad pacem optátam sustinéndam. Francíscus communicatiónis auctóribus appríme se convértit, sed addit quod communicatiónis “cordis ac brachiórum paténtium” offícium ad unumquémque nostrum pértinet.

Haec dicénda fuérunt, nova enuntiábimus próxima hebdómada.