ലോകത്തിൽ അക്രമത്തിന് ഇരകളാകുന്ന കുട്ടികൾ 100 കോടിയോളം!

ജോയി കരിവേലി, വത്തിക്കാൻ സിറ്റി

അനുവർഷം ലോകത്തിൽ അക്രമത്തിന് ഇരകളാകുന്ന കുട്ടികൾ നൂറു കോടിയോളം വരുമെന്ന് “സേവ് ദ ചിൽറൻ”  അഥവാ,, “കുട്ടികളെ രക്ഷിക്കൂ” എന്ന സംഘടന.

വത്തിക്കാനിൽ മൂന്നാാം തീയതി തിങ്കളാഴ്ച (03/02/25) കുട്ടികളുടെ അവകാശങ്ങളെ അധികരിച്ചു നടന്ന അന്താരാഷ്ട്ര സമ്മേളനത്തോടനുബന്ധിച്ച് പുറപ്പെടുവിച്ച ഒരു പത്രക്കുറിപ്പിലാണ് ഈ സംഘടന ഇതു വെളിപ്പെടുത്തിയിരിക്കുന്നത്.

ശാരീരികമായും ലൈംഗികമായും വൈകാരികമായും ആക്രമണത്തിന് ഇരകളാകുന്നവർ ഇതിലുണ്ടെന്നും സേവ് ദ ചിൽറൻ വ്യക്തമാക്കുന്നു. 2023-ൽ ഏതാണ്ട് 5-ൽ ഒരു കുട്ടി വീതം ഏതെങ്കിലും യുദ്ധ വേദിയിലാണ് കഴിഞ്ഞിരുന്നതെന്നും അനുദിനം ശരാശരി 31 കുട്ടികൾ വധിക്കപ്പെട്ടിരുന്നുവെന്നും 50-ൽ ഒരു കുട്ടിവീതം പലായനത്തിനു നിർബന്ധിതമായിരുന്നുവെന്നും സംഘടന വെളിപ്പെടുത്തി.

ആകയാൽ കുട്ടികളുടെ സംരക്ഷണത്തിനായി ആഗോളതലത്തിലുള്ള ഒരു സംവിധാനം ആവശ്യമാണെന്ന് ഒരു നൂറ്റാണ്ടോളമായി കുഞ്ഞുങ്ങളുടെ സംരക്ഷണത്തിനായി പ്രവർത്തിക്കുന്ന സേവ് ദ ചിൽറൻ ചൂണ്ടിക്കാട്ടുന്നു.