ജനങ്ങളെ കുടിയിറക്കുന്ന സംഘർഷവും ദാരിദ്ര്യവും കാലാവസ്ഥയും

സി. റൂബിനി ചിന്നപ്പ൯ സി.റ്റി.സി, വത്തിക്കാ൯ ന്യൂസ്

യൂറോപ്യൻ യൂണിയനിലേക്കുള്ള ക്രമരഹിത കുടിയേറ്റത്തിന്റെ കേന്ദ്രമാണ് ഇറ്റലിയിലെ ലാംപെദൂസാ. കഴിഞ്ഞയാഴ്ച മാത്രം ആഫ്രിക്കയിൽ നിന്ന് 7000 പേരാണ് ടുണീഷ്യയ്ക്കും മാൾട്ടയ്ക്കും ഇടയിലുള്ള ഇറ്റലിയുടെ ഈ ദ്വീപിലെത്തിയത്. 2021 മായി താരതമ്യം ചെയ്യുമ്പോൾ ഇത് മൂന്നിരട്ടിയാണ്. സമുദ്രത്തിലൂടെയുള്ള അപകടം പിടിച്ച ഈ കുടിയേറ്റത്തിൽ ഈ വർഷം മാത്രം 2000 പേരെങ്കിലും മരിച്ചതായി കുടിയേറ്റത്തിനായുള്ള അന്തർദേശീയ സംഘടന അറിയിച്ചു.

റഷ്യൻ അധിനിവേശത്തെ തുടർന്ന് യൂറോപ്പിലേക്ക് യുക്രെയ്ൻ അഭയാർത്ഥി പ്രവാഹമുണ്ടായി. ആഫ്രിക്കയിൽ സാമ്പത്തിക പ്രതിസന്ധിയും ആയുധസംഘർഷങ്ങളും മൂലം കുടിയേറ്റ പ്രതിസന്ധി തുടരുകയാണ്. ഹോൺ ഓഫ് ആഫ്രിക്ക, എത്തിയോപ്പിയ, സുഡാൻ തുടങ്ങിയ രാജ്യങ്ങളിൽ നിന്ന് ആളുകൾ പലായനം ചെയ്തു കൊണ്ടിരിക്കുകയാണ്.

ഏഷ്യയിൽ അടുത്തവർഷങ്ങളിൽ മ്യാന്മറിൽ നിന്ന് ആൻഡമാൻ കടലും ബംഗാൾ ഉൾക്കടലും താണ്ടുന്ന റോഹിങ്ക്യകളും, തെക്കൻ അമേരിക്കയിൽ നിന്ന് മെക്സിക്കോയിലേക്ക് കടക്കാൻ ശ്രമിക്കുന്ന കുടിയേറ്റക്കാരുടെ സമ്മർദ്ദവും ഉണ്ട്.