ഹെയ്തി: മൂന്ന് ദശലക്ഷം കുട്ടികൾക്ക് സഹായം ആവശ്യമാണെന്ന് യൂണിസെഫ്

സി. റൂബിനി ചിന്നപ്പ൯ സി.റ്റി.സി, വത്തിക്കാ൯ ന്യൂസ്

ജീവന് ഭീഷണിയായ പോഷകാഹാരക്കുറവ് അനുഭവിക്കുന്ന കുട്ടികളുടെ എണ്ണം കഴിഞ്ഞ വർഷം മുതൽ 30% വർദ്ധിച്ചു. രാജ്യത്തുടനീളമുള്ള നാലിൽ ഒരു കുട്ടി വിട്ടുമാറാത്ത പോഷകാഹാരക്കുറവ് അനുഭവിക്കുന്നു. സ്കൂളിലേക്കുള്ള യാത്രാമധ്യേ കുട്ടികൾ കൊല്ലപ്പെടുകയോ പരിക്കേൽക്കുകയോ ചെയ്യുന്നു. സ്ത്രീകളും പെൺകുട്ടികളും കടുത്ത ലൈംഗികാതിക്രമങ്ങൾ അനുഭവിക്കുന്നു. അക്രമവും ദാരിദ്ര്യവും നിരാശയും കുട്ടികളെ സായുധ സംഘങ്ങളിൽ ചേരാൻ പ്രേരിപ്പിക്കുന്നുവെന്നും യൂണിസെഫ് വ്യക്തമാക്കി.

ഹെയ്തിയിൽ മാനുഷിക പിന്തുണ ആവശ്യമാണ്. അവിടെ കുട്ടികൾ ദാരിദ്ര്യവും കോളറയുടെ പുനരുജ്ജീവനവും മൂലം ഇതിനകം തന്നെ പട്ടിണിയും പോഷകാഹാരക്കുറവും വർദ്ധിപ്പിക്കുന്ന ഭയാനകമായ അക്രമങ്ങളെ അഭിമുഖീകരിച്ചു വരുന്നു. “ഇന്ന് ഹെയ്തിയിൽ ഒരു കുട്ടിയായിരിക്കുക എന്നത് ജീവനുള്ള ഓർമ്മയിൽ ഉണ്ടായിരുന്നതിനേക്കാൾ കഠിനവും അപകടകരവുമാണ്. കുട്ടികൾ നേരിടുന്ന ഭീഷണികളും ബുദ്ധിമുട്ടുകളും സങ്കൽപ്പിക്കാനാവാത്തതാണ്. അവർക്ക് സംരക്ഷണവും പിന്തുണയും ആവശ്യമാണ്,” എന്ന് ഹെയ്തിയിലെ യൂണിസെഫ് പ്രതിനിധി ബ്രൂണോ മേസ് പറഞ്ഞു.

പ്രധാനമായും തലസ്ഥാനമായ പോർട്ട് - ഓ-പ്രിൻസിലും അടുത്തുള്ള ആർട്ടി ബോണൈറ്റ് മേഖലയിലും സായുധ ഗ്രൂപ്പുകൾ പ്രദേശത്തിനും നിയന്ത്രണത്തിനും വേണ്ടിയുള്ള പോരാട്ടത്തിൽ ജനങ്ങളെ ഭയപ്പെടുത്തുന്നതിനാൽ, കുട്ടികൾ ഏറ്റുമുട്ടലിൽ അകപ്പെടുകയും നേരിട്ട് വധിക്കപ്പെടുകയും ചെയ്യുന്നു. മോചനദ്രവ്യത്തിനായുള്ള തട്ടിക്കൊണ്ടുപോകലുകൾ - വിദ്യാർത്ഥികൾ, അധ്യാപകർ, ആരോഗ്യ പ്രവർത്തകർ എന്നിവരുൾപ്പെടെ - സ്കൂളുകൾക്ക് നേരെയുള്ള ആക്രമണങ്ങളും വർദ്ധിച്ചു. പതിനായിരക്കണക്കിന് ആളുകൾ അക്രമത്തെ തുടർന്ന് പലായനം ചെയ്തിട്ടുണ്ട്.

അക്രമം കൂടാതെ, പട്ടിണിയും, കോളറ പോലുള്ള രോഗങ്ങളും, കടുത്ത കൊടുങ്കാറ്റിന്റെയും, ഭൂകമ്പത്തിന്റെയും നിരന്തരമായ ഭീഷണിയും നേരിടുന്നു. ജൂൺ ആദ്യം, ചുഴലിക്കാറ്റ് സീസണിന്റെ തുടക്കത്തോടൊപ്പമുണ്ടായ കനത്ത മഴ, വിനാശകരവും മാരകവുമായ വെള്ളപ്പൊക്കത്തിന് കാരണമായി. ഈ സംഭവങ്ങളെത്തുടർന്ന്, 2021-ലെ ഭൂകമ്പം ഇപ്പോഴും അടയാളപ്പെടുത്തിയിരിക്കുന്ന പ്രദേശമായ ഗ്രാൻഡ് ആൻസിൽ കുറച്ച് ദിവസങ്ങൾക്ക് ശേഷം ഒരു ഭൂകമ്പമുണ്ടായി. അടിസ്ഥാന സേവനങ്ങൾ, മാനവ മൂലധന വികസനം, അതുപോലെ തന്നെ ഉയർന്ന അസമത്വം, പാർശ്വവൽക്കരണം, സാമൂഹിക ബഹിഷ്കരണം എന്നിവയിൽ ഹെയ്തി ദശാബ്ദങ്ങളായി മോശമായി നിലനിൽക്കുന്നു.