മൊസാംബിക്കിൽ കൊംബോണിയൻ സന്ന്യാസിനി വധിക്കപ്പെട്ടു!

ജോയി കരിവേലി, വത്തിക്കാൻ സിറ്റി

ആഫ്രിക്കൻ നാടായ മൊസാംബിക്കിൽ കൊമ്പോണിയൻ പ്രേഷിതസന്ന്യാസിനി സമൂഹാംഗമായ സന്ന്യാസിനി സഹോദരി മരിയ ദെ കോപ്പി വധിക്കപ്പെട്ടു.

ചൊവ്വാഴ്‌ച (06/09/22) രാത്രി ചിപേനെ എന്ന സ്ഥലത്തെ കൊംബോണിയൻ സമൂഹത്തിൻറെ ഭവനത്തിന് അജ്ഞത സായുധാക്രമികൾ തീകൊളുത്തുകയും 84 വയസ്സു പ്രായമുണ്ടായിരുന്ന ഇറ്റലിയിലെ വേനെത്തൊ സ്വദേശിനിയായ സന്ന്യാസിനി  മരിയ ദെ കോപ്പിയെ വെടിവെച്ചു കൊല്ലുകയുമായിരുന്നു.  അവിടയുണ്ടായിരുന്ന രണ്ടു വൈദികരും രണ്ടുസന്ന്യാസിനികളും ഈ ആക്രമണത്തിൽ നിന്ന് രക്ഷപ്പെട്ടു.

സിസ്റ്റർ മരിയ ദെ കോപ്പി വധിക്കപ്പെട്ടതിൽ ഇറ്റലിയിലെ കത്തോലിക്കാമെത്രാൻ സംഘത്തിൻറെ അദ്ധ്യക്ഷൻ കർദ്ദിനാൾ മത്തെയൊ ത്സൂപ്പി അനുശോചനം രേഖപ്പെടുത്തി.

മൊസ്സാംബിക്കിൽ 6 പതിറ്റാണ്ട് സേവനമനുഷ്ഠിച്ച സഹോദരി മരിയ ദെ കോപ്പിയുടെ ബലി, വർഷങ്ങൾക്കു ശേഷം വീണ്ടും ഇസ്ലാം വിപ്ലവകാരികളുടെ ആക്രമണത്തിൻറെ പ്രഹരം ഏറ്റിരിക്കുന്ന ഒരു മണ്ണിൽ  സമാധാനത്തിൻറെയും അനുരഞ്ജനത്തിൻറെയും വിത്തായി മാറട്ടെയെന്ന് അദ്ദേഹം ആശംസിക്കുകയും പരേതയ്ക്കായി പ്രാർത്ഥിക്കുകയും ചെയ്യുന്നു.