നൈജീരിയ: ദേവാലയാക്രമണകാരികൾ പിടിയിൽ!

ജോയി കരിവേലി, വത്തിക്കാൻ സിറ്റി

ആഫ്രിക്കൻ നാടായ നൈജീരിയായിലെ ഓവ്വൊയിൽ ജൂൺ മാസത്തിൽ ഒരു കത്തോലിക്കാ ദേവാലയം ആക്രമിക്കപ്പെട്ട സംഭവത്തിൽ പ്രതികളെന്നു കരുതപ്പെടുന്ന ഏതാനും പേർ പിടിയിൽ.

പെന്തക്കോസ്താതിരുന്നാൾ ദിനമായിരുന്ന ജൂൺ 5-ന് ഞായറാഴ്ചയാണ് ഓവ്വൊയിൽ വിശുദ്ധ ഫ്രാൻസീസീസിൻറെ നാമധേയത്തിലുള്ള ദേവാലയത്തിൽ 40-ലേറെപ്പേരുടെ മരണത്തിനിടയാക്കുകയും എൺപതിലേറെപ്പേരെ മുറിവേല്പിക്കുകയും ചെയ്ത ആക്രമണം ഉണ്ടായത്.

അറസ്റ്റുചെയ്യപ്പെട്ടവരിൽ ഒരാൾ, പശ്ചിമാഫ്രിക്കൻ പ്രവിശ്യ ഇസ്ലാം രാഷ്ട്ര ഭീകരസംഘടനയിലെ (ISWAP) അംഗമാണെന്നും കൂടുതൽ മാരകമായ ആക്രമണങ്ങൾക്കുള്ള പദ്ധതികൾ പിടിക്കപ്പെട്ട മറ്റു പ്രതികൾ ഇയാളുടെ സഹായത്തോടെ ആവിഷ്ക്കരിച്ചിരുന്നുവെന്നും സൈനികാധികാരികൾ വെളിപ്പെടുത്തി. ഈ പ്രതികൾക്ക് താമസസൗകര്യം ഒരുക്കിയ ഒരാളും പിടിയിലായിട്ടുണ്ട്.