പൂർവ്വതിമോറിൻറെ കത്തോലിക്കാ അനന്യത സ്പർശനവേദ്യം, നിയുക്ത കർദ്ദിനാൾ ദ സിൽവ!

ജോയി കരിവേലി, വത്തിക്കാൻ സിറ്റി

കത്തോലിക്കാ പാരമ്പര്യം പൂർവ്വ തീമോറിൻറെ ദേശീയ അനന്യതയുടെ മൗലിക ഘടകമാണെന്ന് ഈ മാസം 27-ന് വത്തിക്കാനിൽ നടക്കാൻ പോകുന്ന കൺസിസ്റ്ററിയിൽ വച്ച് കർദ്ദിനാളാക്കപ്പെടുന്ന ദിലി അതിരൂപതയുടെ ആർച്ചുബിഷപ്പ്  വിർജീലിയൊ ദൊ കാർമൊ ദ സിൽവ.

ഈ മാസം 27-ന് (2022 ആഗസ്റ്റ്) കർദ്ദിനാളാക്കപ്പെടുന്ന 21 പേരിൽ ഒരാളായ അദ്ദേഹം വത്തിക്കാൻ വാർത്താവിഭാഗത്തിന് അനുവദിച്ച അഭിമുഖത്തിലാണ് ഇതു പറഞ്ഞത്.

ഈ കത്തോലിക്കാ അനന്യത തൊട്ടറിയാവുന്നതാണെന്ന്, ഫ്രാൻസീസ് പാപ്പായും അൽ അഷറിലെ വലിയ ഇമാമും അബുദാബിയിൽ വച്ച് ഒപ്പുവച്ച മാനവസാഹോദര്യ രേഖ, അടുത്തയിടെ നടന്ന ഇരുപതാം സ്വാതന്ത്ര്യവാർഷികാഘോഷവേളയിൽ ദേശീയ പാർലിമെൻറ് അംഗീകരിച്ചത് ഉദാഹരണമായി ചൂണ്ടിക്കാട്ടിക്കൊണ്ട് നിയുക്ത കർദ്ദിനാൾ കാർമൊ ദ സിൽവ പ്രസ്താവിച്ചു.

2002 മെയ് ഇരുപതിനായിരുന്നു പൂർവ്വതിമോറിൻറെ രണ്ടാം സ്വാതന്ത്ര്യലബ്ധി. പൂർവ്വതിമോറിലെ 13 ലക്ഷത്തി 40000-ത്തിലേറെവരുന്ന നിവാസികളിൽ 99.53 ശതമാനം ക്രൈസ്തവരാണ്. ഇവരിൽ 97.57 ശതമാനവും കത്തോലിക്കരും. ഏഷ്യയിൽ ഏറ്റവും കൂടുതൽ കത്തോലിക്കരുള്ള രാജ്യങ്ങളിൽ രണ്ടാം സ്ഥാനം കിഴക്കെ തിമോറിനുണ്ട്. ഒന്നാം സ്ഥാനം ഫിലിപ്പീൻസിനാണ്.