പനാമ ലോക യുവജനോത്സവം ഒരു ആത്മീയ സംഗമം

- ഫാദര്‍ വില്യം നെല്ലിക്കല്‍

ഒരു വിശ്വാസ നവീകരണോത്സവം – പനാമയില്‍
മദ്ധ്യമേരിക്കന്‍ ജനതയുടെ ഒരു വിശ്വാസ നവീകരണോത്സവമാണ് പനാമയില്‍ നടക്കാന്‍ പോകുന്ന ലോക യുവജനോത്സവം. ആയിരക്കണക്കിന് യുവജനങ്ങള്‍ക്ക് പനാമിയിലെ കുടുംബങ്ങള്‍ ആതിഥ്യം നല്ക്കും. പങ്കുവയ്ക്കല്‍, പ്രാര്‍ത്ഥന, കൂട്ടായ്മ എന്നിവയിലൂടെ കുടുംബങ്ങളിലും സമൂഹത്തിലും ഒരാത്മീയ നവീകരണവും  വിശ്വാസജീവിതത്തിന്‍റെ ബലപ്പെടുത്തലും നേടണമെന്നത് ഈ രാജ്യാന്തര യുവജനോത്സവത്തിന്‍റെ പ്രഥമ ലക്ഷ്യമാണ്. 61 വയസ്സുകാരനും അഗസ്തീനിയന്‍ സഭാംഗവുമായ (OSA – Ordo Sancti Agugustini) ആര്‍ച്ചുബിഷപ്പ് ദൊമീങ്കോ വ്യക്തമാക്കി.

ഭൂഖണ്ഡങ്ങളുടെ സംഗമം
അഞ്ചു ഭൂഖണ്ഡങ്ങളിലെയും 190 രാജ്യങ്ങളില്‍നിന്നുമായി പതിനായിരക്കണക്കിന് യുവജനങ്ങളാണ് 2019 ജനുവരി 22-മുതല്‍ 27-വരെ തിയതികളില്‍ പനാമയില്‍ എത്തിച്ചേരാന്‍ പോകുന്നത്. ഈ യുവജനങ്ങള്‍ക്കെന്നപോലെ തെക്കെ അമേരിക്കന്‍ പനാമിയന്‍ കുടുംബങ്ങള്‍ക്കും യേശുവിനെ നവമായി കണ്ടെത്തുന്ന ക്രിസ്തീയകൂട്ടായ്മയുടെ മഹോത്സവമായരിക്കും പാപ്പാ ഫ്രാന്‍സിസ് നേതൃത്വംനല്കുന്ന പനാമ ലോകയുവജനോത്സവമെന്ന് കൂടെയുണ്ടായിരുന്ന സംഘാടകസമിതി അംഗങ്ങളോടു ചേര്‍ന്ന് ആര്‍ച്ചുബിഷപ്പ് ദൊമീങ്കോ വിശദീകരിച്ചു.

രക്തസാക്ഷി റൊമേരോ യുവാക്കള്‍ക്കു പ്രചോദനം
ഈ ലോക സംഗമത്തില്‍ എത്തിച്ചേരുന്ന യുവജനങ്ങള്‍ക്കും തെക്കെ അമേരിക്കന്‍ ജനതയ്ക്കും ആത്മീയ ഉണര്‍വ്വിന്‍റെ ദിവസങ്ങളാകും അവ. അതിഥകള്‍ക്കും ആതിഥേയര്‍ക്കും ഒരുപോലെ ഫലദായകമാണീ മഹാസംഗമം. സ്നേഹത്തിന്‍റെയും സമാധാനത്തിന്‍റെയും ഒരു നവലോകവും നവസഭയും ഈ യുവജനോത്സവത്തിലൂടെ തങ്ങള്‍ സ്വപ്നംകാണുന്നുവെന്നും, ലാളിത്യവും, ആത്മീയാനന്ദവും, പരസ്പര വിശ്വാസവുംകൊണ്ട് ‍തങ്ങള്‍ ഈ യുവജനോത്സവത്തെ ഫലപ്രാപ്തിയിലെത്തിക്കുമെന്ന് ആര്‍ച്ചുബിഷപ്പ് ദൊമീങ്കോ പുഞ്ചരിയോടെ പറഞ്ഞു. അതിന് പുണ്യാത്മാവും രക്ഷസാക്ഷിയുമായ ലാറ്റിനമേരിക്കന്‍ പുത്രന്‍, ആര്‍ച്ചുബിഷപ്പ് ഓസ്ക്കര്‍ രൊമേരോയുടെ മാദ്ധ്യസ്ഥം പ്രാര്‍ത്ഥിക്കുന്നെന്നും ആര്‍ച്ചുബിഷപ്പ് ദോമീങ്കോ പ്രത്യാശയോടെ പ്രസ്താവിച്ചു.