ഉക്രൈയിന് സഹായഹസ്തവുമായി പാപ്പാ വീണ്ടും!
ജോയി കരിവേലി, വത്തിക്കാൻ സിറ്റി
യുദ്ധം പിച്ചിച്ചീന്തിക്കൊണ്ടിരിക്കുന്ന ഉക്രൈയിന് പാപ്പായുടെ സഹായം വീണ്ടുമെത്തി.
മരുന്നുകൾ, വൈദ്യുതിയുൽപ്പാദന യന്ത്രങ്ങളായ ജനറേറ്ററുകൾ, ഭക്ഷ്യവസ്തുക്കൾ തുടങ്ങയവയാണ് സഹായമായി എത്തിച്ചിരിക്കുന്നത്. ശനിയാഴ്ച (25/03/23) ഇറ്റലിയിൽ നിന്ന് ഈ വസ്തുക്കളുമായി പുറപ്പെട്ട ചരക്കു വാഹനം ബുധനാഴ്ച (29/03/23) രാവിലെ ഖാർക്കിവിൽ എത്തിച്ചേർന്നു.
പാപ്പായുടെ ദാനധർമ്മാദി കാര്യങ്ങൾക്കായുള്ള വിഭാഗമായ “എലെമൊസിനെറീയ അപ്പൊസ്തോലിക്ക” (l’Elemosineria apostolica) ആണ് ഇതിന് മേൽനോട്ടം വഹിച്ചത്.
പ്രതികൂല സാഹചര്യങ്ങളെ മറികടന്ന് ഈ ഭക്ഷ്യൗഷധവസ്തുക്കളും മറ്റും അടങ്ങിയ സാഹായം ലക്ഷ്യസ്ഥാനത്തെത്തിക്കാൻ സധൈര്യം മുന്നോട്ടുവന്ന ഡ്രൈവർമാരെ “എലെമൊസിനെറീയ അപ്പൊസ്തോലിക്ക”യുടെ അദ്ധ്യക്ഷൻ കർദ്ദിനാൾ കൊൺറാഡ് ക്രയേവ്സ്ക്കി നന്ദിയോടെ അനുസ്മരിച്ചു. യുദ്ധം തുടരുന്ന അന്നാട്ടിലേക്കുള്ള ഈ ദൗത്യം വിവേകവും അതീവ ശ്രദ്ധയും ആവശ്യമുള്ളതായിരുന്നുവെന്നും അദ്ദേഹം കൂട്ടിച്ചേർത്തു.
വായനക്കാർക്ക് നന്ദി. സമകാലികസംഭവങ്ങളെക്കുറിച്ച് കൂടുതലായി അറിയാൻ ഇവിടെ ക്ലിക് ചെയ്ത് വത്തിക്കാൻ ന്യൂസ് വാർത്താക്കുറിപ്പിന്റെ സൗജന്യവരിക്കാരാകുക: