വത്തിക്കാൻറെ സാംസ്കാരിക വിദ്യഭ്യാസ വിഭാഗത്തിന് പുതിയ മേധാവികൾ!

ജോയി കരിവേലി, വത്തിക്കാൻ സിറ്റി

വത്തിക്കാൻറെ സാംസ്കാരിക വിദ്യഭ്യാസ വിഭാഗത്തിന് പുതിയ തലവനും കാര്യദർശിയും.

പോർച്ചുഗീസ് സ്വദേശിയായ കർദ്ദിനാൾ ജൊസേ തൊളെൻചീനൊ ജെ മെന്തോൺസ് (José Tolentino de Mendonça)നെയാണ് ഈ വിഭാഗത്തിൻറെ പ്രീഫെക്ട് അഥവാ, മേധാവി ആയി ഫ്രാൻസീസ് പാപ്പാ തിങ്കളാഴ്‌ച (26/09/22) നിയമിച്ചത്.

ദൈവശാസ്ത്രജ്ഞനായ, 56 വയസ്സു പ്രായമുള്ള അദ്ദേഹം 1965 ഡിസമ്പർ 15-ന് പോർച്ചുഗലിലെ മശീക്കൊയിൽ ജനിക്കുകയും 1990 ജൂലൈ 28-ന് പൗരോഹിത്യം സ്വീകരിക്കുകയും 2018 ജൂലൈ 28-ന് മെത്രാനായി അഭിഷിക്തനാകുയും 2019 ഒക്ടോബർ 5-ന് കർദ്ദിനാളാക്കപ്പെടുകയും ചെയ്തു.

സഭാവിജ്ഞാനീയാദ്ധ്യാപകനായ ഇറ്റാലിയൻ വൈദികൻ ജൊവാന്നി ചേസറെ പഗാത്സിയെയാണ് (Giovanni Cesare Pagazzi) പാപ്പാ സാംസ്കാരികവിദ്യഭ്യാസ വിഭാഗത്തിൻറെ കാര്യദർശിയായി നാമനിർദ്ദേശം ചെയ്തിരിക്കുന്നത്.

ഇറ്റലിയിലെ ക്രേമയിൽ 1965 ജൂൺ 8-ന് ജനിച്ച അദ്ദേഹം 1990 ജൂൺ 23-ന് പൗരോഹിത്യം സ്വീകരിച്ചു.