ഹംഗറി മുൻ പ്രസിഡന്റിന്റെ നിര്യാണത്തിൽ അനുശോചനമറിയിച്ച് ഫ്രാൻസിസ് പാപ്പാ

മോൺസിഞ്ഞോർ ജോജി വടകര, വത്തിക്കാന്‍ സിറ്റി

2005 മുതൽ 2010 വരെ ഹംഗറിയുടെ പ്രസിഡന്റായിരുന്ന ലാസ്‌ലോ സോലിയോമിന്റെ വേർപാടിൽ, ഹംഗറി പ്രസിഡന്റ് കാതലിൻ നൊവാക്കിന് അനുശോചനസന്ദേശമയച്ചു. ഒക്ടോബർ 10-ന് അയച്ച ടെലഗ്രാം സന്ദേശത്തിൽ, പ്രെസിഡന്റ് സോലിയോമിന്റെ മരണത്തിൽ, ഹംഗറി സർക്കാരിനും, അവിടുത്തെ ജനങ്ങൾക്കും തന്റെ അഗാധമായ അനുശോചനം അറിയിക്കുന്നുവെന്ന് പാപ്പാ എഴുതി.

പ്രെസിഡന്റ് സോലിയോമിന് ദൈവം നിത്യശ്വാസം നൽകട്ടേയെന്ന് താൻ പ്രാർത്ഥിക്കുന്നുവെന്ന് എഴുതിയ പാപ്പാ, അദ്ദേഹത്തിന്റെ വിയോഗത്തിൽ ദുഃഖിക്കുന്ന ഏവർക്കും, പ്രത്യേകിച്ച് കുടുംബാംഗങ്ങൾക്ക് ദൈവം ആശ്വാസവും പ്രത്യാശയും നൽകട്ടെയെന്നും പാപ്പാ ആശംസിച്ചു. ഹംഗറി ജനതയ്ക്ക് പാപ്പാ അനുഗ്രഹാശംസകളും നേർന്നു.

ഒക്ടോബർ 8 ഞായറാഴ്ചയാണ് ദീർഘകാലത്തെ രോഗാവസ്ഥയെത്തുടർന്ന് പ്രസിഡന്റ് ലസ്‌ലോ സോലിയോം അന്തരിച്ചത്. എൺപത്തിയൊന്ന് വയസ്സായിരുന്നു.