പാപ്പാ, പരിശുദ്ധ അമ്മയുടെ സവിധത്തിൽ!

ജോയി കരിവേലി, വത്തിക്കാൻ സിറ്റി

പാപ്പാ തൻറെ ലിസ്ബൺ സന്ദർശനത്തെയും ലോകയുവജനസംഗമത്തിൽ പങ്കെടുക്കുന്ന യുവതീയുവാക്കളെയും പരിശുദ്ധ കന്യകാമറിയത്തിനു സമർപ്പിച്ചു പ്രാർത്ഥിച്ചു.

തൻറെ വിദേശ ഇടയസന്ദർശനങ്ങൾക്കു മുമ്പ് പതിവുള്ളതു പോലെ, ഫ്രാൻസീസ് പാപ്പാ താൻ ആഗസ്റ്റ് 2-ന്, ബുധനാഴ്ച (02/08/23) ആരംഭിക്കുന്ന പഞ്ചദിന ലിസ്ബൺ സന്ദർശനത്തോടനുബന്ധിച്ച്, തിങ്കളാഴ്ച (31/07/23) ഉച്ചതിരിഞ്ഞ് റോമിലെ വിശുദ്ധ മേരി മേജർ ബസിലിക്കയിലെത്തുകയും അവിടെ “റോമൻ ജനതയുടെ രക്ഷ” അഥവാ., “സാളൂസ് പോപുളി റൊമാനി” (Salus populi romani) എന്ന അഭിധാനത്തിൽ വണങ്ങപ്പെടുന്ന പരിശുദ്ധ കന്യകാമറിയത്തിൻറെ പവിത്രസന്നിധിയിൽ പ്രാർത്ഥനയിൽ ചിലവഴിക്കുകയും ചെയ്ത വേളയിലാണ് ഈ സമർപ്പണം നടത്തിയത്.

ഫ്രാൻസീസ് പാപ്പാ ഈ ബസിലിക്കയിൽ പരിശുദ്ധ അമ്മയുടെ സവിധത്തിൽ എത്തുന്നത് ഇത് നൂറ്റിയൊമ്പതാമത്തെ തവണയാണ്. ഓരോ രാജ്യാന്തര യാത്രകൾക്കു മുമ്പും പിമ്പും പാപ്പാ ഈ മാതാവിൻറെ സന്നിധിയിൽ പ്രാർത്ഥിക്കുന്നതിനായി അണയാറുണ്ട്.

പോർച്ചുഗലിൻറെ തലസ്ഥാനമായ ലിസ്ബണിൽ ആഗസ്റ്റ് 1-ന്, ചൊവ്വാഴ്ച തുടക്കം കുറിച്ച മുപ്പത്തിയേഴാം ആഗോള കത്തോലിക്കാ യുവജനസംഗമത്തോട് അനുബന്ധിച്ചാണ് പാപ്പായുടെ ഈ നാല്പത്തിരണ്ടാം വിദേശ അപ്പൊസ്തോലിക പര്യടനം. ബുധനാഴ്ച രാവിലെ റോമിലെ അന്താരാഷ്ട്ര വിമാനത്താളത്തിൽ നിന്ന് ലിസ്ബണിലേക്കു പുറപ്പെടുന്ന പാപ്പാ അഞ്ചാം തീയതി ശനിയാഴ്‌ച (05/08/23) ഫാത്തിമാ നാഥയുടെ സവിധത്തിലും എത്തുകയും ഫാത്തിമാ നാഥയുടെ ദേവാലയത്തിൽ  പ്രത്യക്ഷീകരണത്തിൻറെ കപ്പേളയിൽ വച്ച് യുവ രോഗികളുമൊത്തു കൊന്തനമസ്ക്കാരം ചൊല്ലുകയും ചെയ്യും. ആറാം തീയതി ഞായറാഴ്ച ലോക യുവജനദിനാചരണത്തിൻറെ സമാപന ദിവ്യബലിയിൽ മുഖ്യകാർമ്മികത്വം വഹിക്കുന്ന പാപ്പാ അന്നു രാത്രി വത്തിക്കാനിൽ തിരിച്ചെത്തും.