മെത്തഡിസ്റ്റ് -വാൽദേസ് സഭകൾക്ക് ആശംസകളറിയിച്ച് ഫ്രാൻസിസ് പാപ്പാ

ഫാ.ജിനു തെക്കേത്തലക്കൽ,വത്തിക്കാൻ സിറ്റി

എക്യൂമെനിക്കൽ കൂട്ടായ്മയിൽ അംഗങ്ങളായ മെത്തഡിസ്റ്റ് -വാൽദേസ് സഭയിലെ മെത്രാൻമാരും,പുരോഹിതരും അത്മായപ്രതിനിധികളും പങ്കെടുക്കുന്ന സിനഡിന് ആശംസകളറിയിച്ച് വത്തിക്കാൻ സ്റ്റേറ്റ് സെക്രട്ടറി കർദിനാൾ പിയെത്രോ പരോളിന്റെ കൈയൊപ്പോടുകൂടി ഫ്രാൻസിസ് പാപ്പാ ടെലഗ്രാം സന്ദേശമയച്ചു.

സമ്മേളന ദിനങ്ങൾ ദൈവവുമായും, സഹോദരങ്ങളുമായുള്ള നമ്മുടെ കൂട്ടായ്മയിൽ നമ്മെ ഉറപ്പിക്കുകയും, സ്വീകരിക്കുകയും ചെയ്യുന്ന   ക്രിസ്തുവിനെ കണ്ടുമുട്ടുവാൻ സാധിക്കട്ടെയെന്ന്  പാപ്പാ ആശംസിച്ചു.എക്യൂമെനിക്കൽ കൂട്ടായ്മയിലൂടെ ദൈവം ഇതുവരെയും ചൊരിഞ്ഞ നന്മകൾക്ക് പരിശുദ്ധ പിതാവ്, ദൈവപിതാവിന് സ്തുതികൾ അർപ്പിക്കുന്നതോടൊപ്പം, ഈ സിനഡ് കൂട്ടായ്മ സഭകൾ തമ്മിലുള്ള ഐക്യത്തിനും, പരസ്പരസഹകരണത്തോടെയുള്ള സുവിശേഷസാക്ഷ്യത്തിന് ഇടയാക്കട്ടെയെന്നും പ്രാർത്ഥിക്കുന്നു.

ഈ സിനഡിൽ ഫലപ്രദങ്ങളായ ധാരാളം കാര്യങ്ങൾ രൂപപെടട്ടെയെന്നും പാപ്പാ ആശംസിച്ചു.ദൈവാനുഗ്രഹം സിനഡിൽ പങ്കെടുക്കുന്ന എല്ലാവരുടെയും മേൽ ഉണ്ടാകട്ടെയെന്ന പ്രാർത്ഥനയോടെയാണ് ടെലഗ്രാം സന്ദേശം അവസാനിപ്പിക്കുന്നത്.

എക്യൂമെനിക്കൽ  കൂട്ടായ്മയ്ക്കും,മതസൗഹാർദ്ദത്തിനും തന്റെ പത്രോസിനടുത്ത അജപാലന ശുശ്രൂഷ തൂങ്ങിയ നാൾ മുതൽ ഏറെ പ്രാധാന്യം കൊടുക്കുകയും, ഈ കൂട്ടായ്മകൾ പ്രവൃത്തിപഥത്തിൽ എത്തിക്കുവാൻ സ്ഥിരോത്സാഹത്തോടെ പ്രവർത്തിക്കുകയും,പ്രോത്സാഹിപ്പിക്കുകയും ചെയ്യുന്ന ഫ്രാൻസിസ് പാപ്പാ മറ്റു  സഭകളുടെ എല്ലാ പ്രധാന സമ്മേളനങ്ങൾക്കും സന്ദേശങ്ങൾ കൈമാറുന്നതും പതിവാണ്.