പാപ്പായ്ക്ക് ഒരു സമാധാന പുരസ്കാരം!

ജോയി കരിവേലി, വത്തിക്കാൻ സിറ്റി

ഫ്രാൻസീസ് പാപ്പായ്ക്ക് “സമാധാനത്തിനായി സിനിമ” എന്ന പുരസ്ക്കാരം.

ചലച്ചിത്രങ്ങളിലൂടെ ലോകത്തിൽ മൂല്യവും പരിവർത്തനങ്ങളും പരിപോഷിപ്പിക്കുന്നതിന് സ്ലെോവേനിയക്കാരനായ രചയിതവും സിനിമാനിർമ്മാതാവുമായ ജാക്ക ബിസിൽജ് 2001-ൽ സ്ഥാപിച്ച “സിനിമ സമാധാനത്തിന്” എന്ന ഫൗണ്ടേഷനാണ് 2002 മുതൽ ഈ പുരസ്കാരം നല്കുന്നത്.

ഉക്രൈനിൽ നടക്കുന്ന യുദ്ധത്തിനറുതിവരുത്തുന്നതിന് കഴിഞ്ഞ ഒന്നര വർഷത്തിനടുത്തായി നടത്തിക്കൊണ്ടിരിക്കുന്ന സമാധാന പ്രവർത്തനങ്ങൾക്ക് അംഗീകാരമായിട്ടാണ് ഈ വാർഷിക പുരസ്കരം ഇത്തവണ പാപ്പായ്ക്ക് നല്കിയത്.

ശാന്തിയുടെ യഥാർത്ഥ മനുഷ്യനും ദൈവത്തിൻറെ നയതന്ത്രജ്ഞനുമായ ഫ്രാൻസീസ് പാപ്പാ ഉക്രൈയിൻ ജനതയ്ക്ക് സ്വാതന്ത്ര്യം സംലഭ്യമാക്കുന്നതിന് കഴിഞ്ഞ ഒന്നര വർഷത്തോളമായി, സാധ്യമായ എല്ലാ വാതിലുകളിലും നിശബ്ദമായി മുട്ടിക്കൊണ്ടിരിക്കയാണെന്നും അതാണ് ഈ പുരസ്ക്കാരം പാപ്പായ്ക്കു നല്കുന്നതിനുള്ള കാരണമെന്നും ഈ സമാധാന ഫൗണ്ടേഷൻറെ സ്ഥാപകാദ്ധ്യക്ഷനായ ബിസിൽജ് വെളിപ്പെടുത്തി.

വത്തിക്കാനിൽ, തൻറെ വാസയിടമായ ദോമൂസ് സാംക്തെ മാർത്തെ മന്ദിരത്തിലെ ശാലയിൽ വച്ച് പുരസ്കാരം സ്വീകരിച്ച പാപ്പാ, അതു നല്കിയ ബിസിൽജിന് നന്ദി രേഖപ്പെടുത്തുകയും തനിക്കായി പ്രാർത്ഥിക്കണമെന്ന് അഭ്യർത്ഥിക്കുകയും ചെയ്തു.