സന്നദ്ധ സേവനം ഒരു ദൈവകൃപ, അത് ഐക്യം സംജാതമാക്കുന്നു, പാപ്പാ!

ജോയി കരിവേലി, വത്തിക്കാൻ സിറ്റി

സന്നദ്ധ പ്രവർത്തനമെന്നത് എന്തെങ്കിലും കാര്യത്തിൻറെ സാക്ഷാത്ക്കാരത്തിനായി ചട്ടക്കൂടുകളെ ഭേദിച്ചു പുറത്തുകടക്കാൻ അനുവദിക്കുന്ന ഭേദകശക്തിയാണെന്ന് മാർപ്പാപ്പാ.

സാമൂഹ്യസാമ്പത്തിക വികസനത്തിനായുള്ള സന്നദ്ധപ്രവർത്തകരുടെ അന്താരാഷ്ട്രദിനം ആചരിക്കപ്പെട്ട ഡിസമ്പർ 5-ന് തിങ്കളാഴ്‌ച (05/12/22) ഫ്രാൻസീസിസ് പാപ്പാ, 2023 ആഗസ്റ്റ് 1-6 വരെ പോർട്ടുഗലിലെ ലിസ്ബണിൽ ആഗോളസഭാതലത്തിൽ ആചരിക്കപ്പെടുന്ന ലോകയുവജനദിനത്തിനായി പ്രവർത്തിക്കുന്ന, സന്നദ്ധസേവകർക്കായി സ്പാനിഷ് ഭാഷയിൽ നല്കിയ വീഡിയൊ സന്ദേശത്തിലാണ് ഈ പ്രസ്താവനയുള്ളത്.

സന്നദ്ധ സേവനം ഒരു ദൈവകൃപയും ഓരോ സന്നദ്ധ പ്രവർത്തകൻറെയും ഉദാരത സഭയുടെ ശക്തിയും സഭാദൗത്യത്തിൻറെ ആവിഷ്ക്കാരവുമാണെന്ന് പാപ്പാ പറയുന്നു.

അതുപോലെതന്നെ സന്നദ്ധ സേവനം ഐക്യം സംജാതമാക്കുന്നുവെന്നും പാപ്പാ ഉദാഹരണസഹിതം കൂട്ടിച്ചേർക്കുന്നു.