ഫ്രാൻസിസ് പാപ്പാ നവംബറിൽ ബഹ്റൈൻ സന്ദർശിക്കും

മോൺസിഞ്ഞോർ ജോജി വടകര, വത്തിക്കാന്‍ സിറ്റി

ഫ്രാൻസിസ് പാപ്പാ നവംബറിൽ ബഹ്റൈൻ സന്ദർശിക്കുമെന്ന് വത്തിക്കാൻ പത്രം ഓഫിസ് ഡയറക്ടർ മത്തെയോ ബ്രൂണി അറിയിച്ചു. 2022 നവംബർ 3 മുതൽ 6 വരെയുള്ള തീയതികളിൽ ഫ്രാൻസിസ് പാപ്പാ ബഹ്‌റൈനിൽ ആയിരിക്കുമെന്ന് അദ്ദേഹം വ്യക്തമാക്കി.

ബഹ്‌റൈനിലെ സിവിൽ, സഭാ അധികാരികളുടെ ക്ഷണം സ്വീകരിച്ചാണ്, ഫ്രാൻസിസ് മാർപാപ്പ ഈ വർഷം നവംബർ 3 മുതൽ 6 വരെ ബഹ്‌റൈൻ രാജ്യത്തിലേക്ക് അപ്പസ്തോലികയാത്ര നടത്തുന്നതെന്ന് സെപ്റ്റംബർ 28 ബുധനാഴ്ച വത്തിക്കാൻ പത്രം ഓഫിസ് വ്യക്തമാക്കി.

"പരസ്പരസംവാദങ്ങൾക്കായുള്ള ബഹ്‌റൈൻ ഫോറം: മനുഷ്യസഹവാസത്തിനായി കിഴക്കും പടിഞ്ഞാറും" എന്ന സമ്മളനത്തിലും പാപ്പാ പങ്കെടുക്കും. ഈ യാത്രയിൽ പാപ്പാ, മനാമ, അവാലി എന്നീ നഗരങ്ങൾ സന്ദർശിക്കും.

യാത്രയെ സംബന്ധിച്ച കൂടുതൽ വിവരങ്ങൾ പിന്നീട് അറിയിക്കുമെന്ന്, പ്രസ്താവനയിൽ പത്രം ഓഫീസ് വ്യക്തമാക്കി.

2014 മെയ് 19-ന് ഫ്രാൻസിസ് പാപ്പാ, ബഹ്‌റൈൻ രാജാവ് ഹമദ് ബിൻ ഇസ അൽ ഖാലിഫയെ വത്തിക്കാനിൽ സ്വീകരിച്ചിരുന്നു. മധ്യപൂർവ്വദേശത്തെ സമാധാനം, സുസ്ഥിരത, സമാധാനപൂർണമായ സഹവാസം തുടങ്ങിയ വിഷയങ്ങൾ അന്നത്തെ ചർച്ചകളിൽ ഇടംപിടിച്ചിരുന്നു.