പാപ്പാ, കസാഖ്സ്ഥാൻ സന്ദർശിക്കാൻ ആഗ്രഹിക്കുന്നു!

ജോയി കരിവേലി, വത്തിക്കാൻ സിറ്റി

കസാഖ്സ്ഥാൻ സന്ദർശിക്കാനുള്ള തൻറെ ആഗ്രഹം പാപ്പാ വെളിപ്പെടുത്തി.

അന്നാടിൻറെ പ്രസിഡൻറ് കാസിം ജോമാർട്ട് തൊക്കയേവുമായി (Kassym-Jomart Tokayev) തിങ്കളാഴ്ച (11/04/22) നടത്തിയ വീഡിയൊ സംഭാഷണ മദ്ധ്യേയാണ് ഫ്രാൻസീസ് പാപ്പാ ഈ അഭിലാഷം പ്രകടിപ്പിച്ചതെന്ന് പരിശുദ്ധസിംഹാസനത്തിൻറെ വാർത്താവിതരണ കാര്യാലയത്തിൻറെ (പ്രസ്സ് ഓഫീസ്) മേധാവി മത്തേയൊ ബ്രൂണി വെളിപ്പെടുത്തി.

കസാഖ്സ്ഥാൻറെ തലസ്ഥാനമായ നൂർ സുൽത്താനിൽ (Nur-Sultan) ഇക്കൊല്ലം സെപ്റ്റംബറിൽ നടത്താൻ നിശ്ചയിച്ചിരിക്കുന്ന ലോകമതങ്ങളുടെയും പാരമ്പര്യമതങ്ങളുടെയും നേതാക്കളുടെ ഏഴാം സമ്മേളനത്തോടനുബന്ധിച്ചാണ് പാപ്പാ അവിടെ എത്തണമെന്ന തൻറെ അഭിവാഞ്ഛ പ്രകടിപ്പിച്ചത്.

2019 മാർച്ച് വരെ അസ്താന എന്നറിയപ്പെട്ടിരുന്ന ഈ നഗരത്തിൽത്തന്നെയാണ് ഈ മതനേതാക്കളുടെ പ്രഥമ സമ്മേളനം 2003-ൽ നടന്നത്.

2002, ജനുവരിയിൽ ഇറ്റലിയിലെ അസ്സീസി പട്ടണത്തിൽ വിശുദ്ധ രണ്ടാം ജോൺ പോൾ മാർപ്പാപ്പാ വിളിച്ചുകൂട്ടിയ, സമാധാനത്തിനു വേണ്ടിയുള്ള സർവ്വമത പ്രാർത്ഥനാ സമ്മേളനത്തിൻറെ മാതൃകയിലായിരുന്നു ഈ സമ്മേളനം സംഘടിപ്പിക്കപ്പെട്ടത്.

"കോവിദ് 19 മഹാമാരിയന്തര കാലഘട്ടത്തിൽ നകുലത്തിൻറെ സാമൂഹിക-ആത്മീയ പുരോഗതിയിൽ ലോകമതങ്ങളുടെയും പരമ്പരാഗത മതങ്ങളുടെയും നേതാക്കളുടെ പങ്ക്" എന്ന പ്രമേയമാണ് ഭാവി സമ്മേളനം സ്വീകരിച്ചിരിക്കുന്നത്.

മതാന്തരസംഭാഷണ പരിപോഷണ വീക്ഷണത്തിൽ അതിയായ ആകാംക്ഷയോടെയാണ് താൻ ഈ സമ്മേളനം കാത്തിരിക്കുന്നതെന്നും ഇന്നത്തെ ദുഷ്കര ഭൂരാഷ്ട്രതന്ത്രാവസ്ഥയിൽ ലോകത്തെ ഐക്യത്തിലേക്കും ഏകതാനതയിലേക്കും നയിക്കുകയെന്നത് അടിയന്തിരപ്രാധാന്യം കൈവരിക്കുന്നുവെന്നും പാപ്പാ വീഡിയൊ സംഭാഷണ വേളയിൽ പറഞ്ഞു.

കസാഖ്സ്ഥാൻറെ നാനാത്വത്തിലുള്ള ഏകത്വം അന്നാടിൻറെ കെട്ടുറപ്പിൻറെ അടിസ്ഥാനമാണെന്ന് അനുസ്മരിച്ച പാപ്പാ തൻറെ പിന്തുണ ഉറപ്പേകുകയും ചെയ്തു.