അണുവായുധ വിമുക്ത ലോകത്തിനായി മെത്രാന്മാരുടെ പങ്കാളിത്ത കരാർ

ജോയി കരിവേലി, വത്തിക്കാൻ സിറ്റി

ആണവ മുക്ത ലോകത്തിനായി സംഘാതമായി യത്നിക്കാൻ പ്രതിജ്ഞാബദ്ധരായി ജപ്പാനിലെയും അമേരിക്കൻ ഐക്യനാടുകളിലെയും കത്തോലിക്കാ മെത്രാന്മാർ.

1945 ആഗസ്റ്റ് 6, 9 തീയതികളിൽ ജപ്പാനിലെ, യഥാക്രമം, ഹിരോഷിമ, നാഗസാക്കി എന്നീ നഗരങ്ങളെയും അവിടങ്ങളിലെ പതിനായിരക്കണക്കിനാളുകളെയും വെണ്ണീറാക്കിയ,  അമേരിക്കന്‍ ഐക്യനാടുകളുടെ അണുബോംബാക്രമണത്തിൻറെ എഴുപത്തിയെട്ടാം വാർഷികവേളയിലാണ് ഈ തീരുമാനം ഉണ്ടായത്.

അമേരിക്കൻ ഐക്യനാടുകളിലെ സാന്ത ഫെ അതിരൂപതയുടെ ആർച്ചുബിഷപ്പ് ജോൺ വെസ്റ്ററും സീറ്റിൽ അതിരൂപതയുടെ ആർച്ചുബിഷപ്പ് പോൾ എത്തിയേന്നും ഈ ദുരന്ത വാർഷികത്തോടനുബന്ധിച്ച് ഈ മാസം 1-9 വരെ ജപ്പാനിലേക്കു നടത്തിയ ശാന്തി തീർത്ഥാടന വേളയിലാണ് അവരോടൊപ്പം, നാഗസാക്കി അതിരൂപതയുടെ ആർച്ചുബിഷപ്പ് പീറ്റർ മിച്ചിയാക്കി നക്കമൂറയും ഹിരോഷിമ രൂപതയുടെ മെത്രാൻ അലേക്സിസ് മിത്സൂറി ഷിരഹാമയും നാഗസാക്കിയുടെ മുൻ ആർച്ചുബിഷപ്പ് ജോസഫ് മിത്സ്വാക്കി തക്കാമിയും ചേർന്ന് ഈ പങ്കാളിത്ത പ്രഖ്യാപനം ഒപ്പുവച്ചത്.

ആണവ വിമുക്ത ലോകത്തിനായുള്ള സമൂർത്ത യത്നത്തിൽ 2025-ഓടെ പ്രകടമായ പുരോഗതി ഉണ്ടാക്കാനുള്ള ആഹ്വാനവും ഈ അഞ്ചു മെത്രാന്മാർ ഒപ്പുവച്ച പങ്കാളിത്ത ഉടമ്പടിയിൽ ഉണ്ട്.

അണുവായുധങ്ങൾ പൂർണ്ണമായി ഇല്ലാതാക്കുന്നതിന് പര്യാപ്തമായ നടപടികൾ സ്വീകരിക്കണമെന്ന് ഈ മെത്രാന്മാർ ലോകനേതാക്കളോട് ആവശ്യപ്പെടുന്നു.

അണുബോംബുവർഷണം മൂലം ഹരോഷിമയിലെയും നാഗസാക്കിയിലെയും ജനങ്ങൾ ദീർഘകാലമായി അനുഭവിക്കുന്ന ദുരിതങ്ങളും യുറേനിയം ഖനനവും അണുവായുധ നിർമ്മാണവും പരിസ്ഥിതിക്കേല്പിക്കുന്ന ആഘാതങ്ങളും തിരിച്ചറിയണമെന്നും മെത്രാന്മാർ പറയുന്നു.