ഓട്ടിസം ബാധിതരോട് അനുഭാവപൂർവം കത്തോലിക്കാ സഭ

ഫാ. ജിനു ജേക്കബ്, വത്തിക്കാൻ സിറ്റി

ഏപ്രിൽ മാസം രണ്ടാം തീയതി ആഗോള ഓട്ടിസം ബോധവത്ക്കരണ ദിനാചരണത്തോടനുബന്ധിച്ച് മാർച്ച് 30 മുതൽ ഏപ്രിൽ 2 വരെ ഇറ്റലിയിലെ അസ്സീസിയിലെ പ്രധാന ബസിലിക്കയുടെ മുൻഭാഗം നീല  നിറത്തിൽ പ്രദർശിപ്പിക്കപ്പെടും.ആഗോളതലത്തിൽ നടക്കുന്ന പ്രചാരണപ്രവർത്തനങ്ങളുടെ ഭാഗമായി '2023 നീലനിറത്തിൽ പ്രകാശിക്കപ്പെടട്ടെ' എന്ന ആപ്തവാക്യത്തെ പിന്താങ്ങിക്കൊണ്ടാണ് അസ്സീസ്സിയിൽ ഇപ്രകാരം ദീപപ്രകാശനം സംഘടിപ്പിക്കുന്നത്.

ഓട്ടിസത്തെക്കുറിച്ചുള്ള അവബോധവും അറിവും പൗരന്മാർക്ക് നൽകുകയും, ആ കുട്ടികളുടെ ഉന്നമന പ്രവർത്തങ്ങൾക്ക്  പ്രോത്സാഹനം നൽകുകയും,  വിദ്യാഭ്യാസം നൽകുകയും ചെയ്യുക എന്ന ലക്ഷ്യത്തോടെയുള്ള  ഉംബ്രിയ പ്രവിശ്യയിലെ ഒരു സംഘടനയാണ് കത്തോലിക്കാസഭയുമായി ചേർന്ന് ഈ സംരംഭം നടത്തുന്നത്.

എല്ലാവരേയും, പ്രത്യേകിച്ച് ദുർബലരും പാർശ്വവൽക്കരിക്കപ്പെട്ടവരുമായ ആളുകളെ  ഉൾക്കൊള്ളുന്നതിനും അവരുടെ ജീവനെയും, ജീവിതത്തെയും മൂല്യവത്കരിക്കുന്നതിനുമുള്ള വർദ്ധിച്ചുവരുന്ന വ്യാപകമായ സംസ്കാരത്തിന് സംഭാവനകൾ നൽകുവാനും ഇത്തരം കാര്യങ്ങൾ സഹായകരമാകുമെന്ന് അസ്സീസിയിലെ വാർത്താവിനിമയത്തിന്റെ ചുമതല വഹിക്കുന്നഫാ. ജൂലിയോ ചെസാരെയോ അറിയിച്ചു.