നിക്കരാഗ്വ- ഒരു മെത്രാനുൾപ്പടെ 9 കത്തോലിക്കരെ പൊലീസ് ബന്ധനസ്ഥരാക്കി!

ജോയി കരിവേലി, വത്തിക്കാൻ സിറ്റി

നിക്കരാഗ്വയിലെ മത്തഗാല്പ രൂപതാസ്ഥാനത്ത് ആഗസ്റ്റ് 4 മുതൽ വീട്ടുതടങ്കലിലായിരുന്ന മെത്രാൻ റൊളാന്തൊ ഹസേ ആൽവരെസിനെയും വൈദികരും വൈദികാർത്ഥികളും അൽമായവിശ്വാസികളുമുൾപ്പടെ മറ്റ് എട്ടുപേരെയും  പൊലീസും അർദ്ധസുരക്ഷാപ്പോലീസും ചേർന്ന് ബലാൽക്കാരമായി പിടിച്ചുകൊണ്ടുപോയി.

വെള്ളിയാഴ്ച (19/08/22) രാത്രിയിൽ ആയിരുന്നു സംഭവം. 8 വാഹനങ്ങളുമായി എത്തിയാണ് പൊലീസ് അരമനയിൽ ഇടിച്ചുകയറി ഈ കൃത്യം നിർവ്വഹിച്ചതെന്ന് ദൃക്സാക്ഷികൾ വെളിപ്പെടുത്തി.

ഇവരെ നിക്കരാഗ്വയുടെ തലസ്ഥാനമായ മനാഗ്വയിലേക്കാണ് കൊണ്ടുപോയത്. ചോദ്യം ചെയ്യുന്നതിനാണ് ഇവരെ കൊണ്ടു പോയിരിക്കുന്നതെന്നാണ് പൊലീസ് ഭാഷ്യം. ഈ സംഭവത്തിൽ ലത്തീനമേരിക്കയിലെ ആകമാനകത്തോലിക്കാ സഭ വേദനയും ആശങ്കയും രേഖപ്പെടുത്തുകയും അവരെ ഉടൻ വിട്ടയക്കണമെന്ന് ആവശ്യപ്പെടുകയും ചെയ്യുന്നു.

നിക്കരാഗ്വയുടെ പ്രസിഡൻറ് ദാനിയേൽ ഒർത്തേഗയുടെ ഭരണത്തെ വിമർശിക്കുന്നവർക്കെതിരെ സ്വീകരിക്കുന്ന അടിച്ചമർത്തൽ നടപടികൾ സർക്കാൽ കത്തോലിക്കാസഭയുടെ നേർക്കും ശക്തമാക്കിയിരിക്കയാണ്. ഈ ആഗസ്റ്റ്മാസത്തിൽ നിക്കരാഗ്വയിൽ 7 കത്തോലിക്കാ റേഡിയൊ നിലയങ്ങൾ സർക്കാർ അടച്ചു പൂട്ടി.

സർക്കാരിൻറെ സ്വേച്ഛാധിപത്യപരവും നീതിരഹിതവുമായ ഭരണത്തിനെതിരെ സ്വരമുയർത്തിയതാണ് കത്തോലിക്കാസഭയ്ക്കെതിരെയുള്ള ഇത്തരം നടപടികൾക്കു കാരണം. സർക്കാരിനെ അട്ടിമറിക്കാൻ ചില മെത്രാന്മാർ ഗൂഢാലോചന നടത്തുന്നതായി ഒർത്തേഗ ആരോപിക്കുന്നു.