പെറുവിൽ ഒരു നിണസാക്ഷി സഭയിലെ വാഴ്ത്തപ്പെട്ടവരുടെ ഗണത്തിലേക്ക്!

ജോയി കരിവേലി, വത്തിക്കാൻ സിറ്റി

നിണസാക്ഷി മരിയ അഗുസ്തീന റീവസ് ലോപെസ് വാഴ്ത്തപ്പെട്ടവളായി പ്രഖ്യാപിക്കപ്പെട്ടു.

തെക്കെ അമേരിക്കൻ നാടായ പെറുവിൽ ശനിയാഴ്ച (07/05/22) ആയിരുന്നു വാഴ്ത്തപ്പെട്ടപദ പ്രഖ്യാപനം.

ഫ്രാൻസീസ് പാപ്പായുടെ പ്രത്യേക പ്രതിനിധിയായി മെക്സിക്കോയിലെ മേരിദ അതിരൂപതയുടെ മെത്രാപ്പോലീത്ത കർദ്ദിനാൾ  ബൽത്തസാർ എൻറീക്കെ പൊറാസ് കർദോസ ആയിരുന്നു കാർമ്മികൻ.

പെറുവിലെ കോറകോറ എന്ന സ്ഥലത്ത് 1920 ജൂൺ 13-നായിരുന്ന നവവാഴ്ത്തപ്പെട്ട രക്തസാക്ഷി മരിയ അഗൊസ്തീന റീവസ് ലോപെസിൻറെ ജനനം. അന്തോണിയ ലൂസ്മീല എന്നായിരുന്നു അന്നത്തെ അവളുടെ പേര്.

1941-ൽ നല്ല ഇടയൻറെ ഉപവിയുടെ നാഥ എന്ന സന്ന്യാസിനീസമൂഹത്തിൽ ചേർന്ന മരിയ അഗുസ്തീന  1949 ഫെബ്രുവരി 8-ന് നിത്യവ്രത വാഗ്ദാനം നടത്തി.

അടുക്കള ജോലി മുതൽ അദ്ധ്യാപികവരെ വിവിധ തലങ്ങളിൽ സേവനം ചെയ്ത അവൾ  “തിളങ്ങുന്ന സരണി”  എന്നർത്ഥം വരുന്ന “സെന്തേരൊ ലുമിനോസൊ” മാവോയിസ്സ് വിപ്ലവ പ്രസ്ഥാനം ശക്തിയാർജ്ജിച്ച കാലഘട്ടത്തിൽ, 1988-ൽ, പെറുവിലെ തന്നെ യുനീൻ പ്രദേശത്തുള്ള ല ഫ്ലോറിദയിലേക്ക് പ്രേഷിതയായി അയയ്ക്കപ്പെട്ടു. മാവോയിസ്റ്റ് ഭീകരപ്രവർത്തനങ്ങളാൽ അപകടകരമായ അവസ്ഥ നിലനിന്നിരുന്ന അവിടെ തദ്ദേശീയ ഗ്രാമീണ സ്ത്രീകളുടെ ഉന്നമനത്തിനായി,നവവാഴ്ത്തപ്പെട്ട മരിയ അഗൊസ്തീന പ്രവർത്തനമാരംഭിച്ചു. എന്നാൽ ആ പ്രേഷിതത്വം അധികനാൾ മുന്നോട്ടുകൊണ്ടുപോകാൻ അവൾക്കായില്ല.

1990 സെപ്റ്റംബർ 27-ന് “സെന്തേരൊ ലുമിനോസൊ” മാവോയിസ്സ് വിപ്ലവ പ്രസ്ഥാനത്തിലെ ഒരു യുവസംഘം, ലാളിത്യം, വിരക്തി, ആർദ്രത, പ്രസന്നത, മനോഗുണം എന്നിവ കൈമുതലാക്കിയിരുന്ന   മരിയ അഗൊസ്തീന റീവസ് ലോപെസിനെ വധിച്ചു.