തിരയുക

Vatican News
കർദ്ദിനാൾമാർക്കുള്ള ചുവന്ന തൊപ്പികൾ! കർദ്ദിനാൾമാർക്കുള്ള ചുവന്ന തൊപ്പികൾ!  (Vatican Media)

കർദ്ദിനാൾ സംഘത്തിലെ അംഗ സംഖ്യ ഉയരുന്നു; ഇന്ന് കൺസിസ്റ്ററി!

ഇന്ന് വൈകുന്നേരം പുതിയ പതിമൂന്നു കർദ്ദിനാൾമാർ കൂടി കർദ്ദിനാൾ സംഘത്തിലേക്ക്.

ജോയി കരിവേലി, വത്തിക്കാൻ സിറ്റി

ഫ്രാൻസീസ് പാപ്പാ ഈ ശനിയാഴ്ച (28/11/20) 13 പേരെ കർദ്ദിനാൾസ്ഥാനത്തേക്കുയർത്തുന്നതോടെ ആഗോളസഭയിലെ കർദ്ദിനാളന്മാരുടെ സംഖ്യ 229 ആയി ഉയരും.

ഇവരിൽ 128 പേർ 80 വയസ്സിൽ താഴെ പ്രായമുള്ളവരാകയാൽ മാർപ്പാപ്പായെ തിരഞ്ഞെടുക്കുന്ന കോൺക്ലേവിൽ സംബന്ധിച്ച് സമ്മതിദാനം നല്കാൻ അവകാശമുള്ളവരാണ്.

എന്നാൽ ശേഷിച്ച 101 പേർ പ്രായപരിധി കഴിഞ്ഞതിനാൽ ഈ വോട്ടവകാശമില്ലാത്തവരാണ്.

ശനിയാഴ്ച വൈകുന്നേരം വത്തിക്കാനിൽ വിശുദ്ധ പത്രോസിൻറെ ബസിലിക്കയിൽ നടക്കുന്ന സാധാരണ പൊതുകൺസിസ്റ്ററിയിൽ വച്ചാണ് പാപ്പാ കർദ്ദിനാളന്മാരെ വാഴിക്കുക.

ചുവന്ന തൊപ്പി, മോതിരം എന്നിവ അണിയിക്കല്‍, ഓരോ കര്‍ദ്ദിനാളിനുമുള്ള സ്ഥാനികദേവാലയം നല്കൽ എന്നിവ ഈ ചടങ്ങിൻറെ ഭാഗമാണ്.

കോവിദ് 19 മഹാമാരിയെ പ്രതിരോധിക്കുന്നതിനുള്ള നിയന്ത്രണങ്ങൾ പാലിച്ചുകൊണ്ടായിരിക്കും ചടങ്ങുകൾ.

വിവിധരാജ്യക്കാരായ 13 പേരിൽ ഏഷ്യക്കാരായ രണ്ടു പേർക്ക്, അതായത്, തെക്കു-കിഴക്കന്‍ ഏഷ്യന്‍ രാജ്യമായ ബ്രൂണേയിയുടെ അപ്പസ്തോലിക വികാരിയായ ബിഷപ്പ് കൊര്‍ണേലിയൂസ് സിമ്മിനും ഫിലിപ്പീന്‍സിലെ കപീസ് അതിരൂപതാദ്ധ്യക്ഷന്‍, ആര്‍ച്ചുബിഷപ്പ് ഹൊസ്സെ ഫുയര്‍സേ അദ്വേങ്കുളയ്ക്കും ഇതിൽ നേരിട്ടു പങ്കെടുക്കാൻ സാധിക്കില്ല. അവർ ഇൻറർ നെറ്റിൻറെ സഹായത്തോടെ ഇതിൽ സംബന്ധിക്കും.



 

28 November 2020, 11:32