Папата потсети на Светскиот ден на сиромашни
После молитвата Ангел Господов во недела 17 ноември 2019 година, Светиот Отец напомена дека вчера во Еквадор за блажен е прогласен отец Емилио Москосо, свештеник од Дружбата Исусова, убиен 1897 година, за време на прогонството на Католичката црква во таа земја. Неговиот пример на понизен монах, апостол на молитва и воспитувач на младите нека биде помош на нашиот пат на вера и христијанско сведоштво – рече Папата и потсети дека денес се одбележува и Светскиот ден на сиромашни, кој оваа година за тема ги има зборовите од 9 Псалм: Надежта на бедните нема никогаш да престане (Псалм 9,18).
Светиот Отец се заблагодари на сите кои во бискупиите и парохиите во целиот свет промовираат иницијативи на солидарност, како и на лекарите и медицинските сестри, кои овие денови волонтираат во здравствените центри за бездомници на плоштадот Свети Петар. Светиот Отец предупреди потоа дека никогаш не смее да недостасува внимание кон нашите браќа и сестри во потреба. На крајот папата Фрањо потсети дека во вторник започнува Апостолското патување во Тајланд и Јапонија и се препорача во молитвите.