Бискупот Стојанов ги однесе моштите на свети Кирил во Соборниот храм во Скопје
о. Гоце Костов
Скопскиот бискуп и Струмичко - скопски епарх монс. Киро Стојанов, на 24 мај 2022 година, на празникот на светите браќа Кирил и Методиј, на денот кога МПЦ-ОА се здоби со автокефален статус, ги донесе единствените мошти во Македонија на Свети Кирил Солунски во Соборниот храм „Свети Климент Охридски“ во Скопје, а по барање на архиепископот Македонски и Охридски, г.г. Стефан. Моштите беа изложени за време на светата Литургија, која ја служеа архиепископот Македонски и Охрдиски г.г. Стефан и Српискиот патријарх г.г. Порфириј. По светата Литургија присутните верници имаа можност да се поклонат пред моштите на Свети Кирил Солунски и да ги чествуваат.
На светата Литургија присуствуваше и бискупот Стојанов во придружба на о. Марјан Ристов и дон Томаш Бак.
Моштите на свети Кирил Солунски кои се единствени во Македонија и ги поседува Католичката црква имаат уверение за веродостојност издадено од надлежните црковни власти во епархијата, каде се наоѓа гробот на свети Кирил.
