Ամէն ջանք ներդնել Արցախահայութեանը նոր պատուհասներից փրկելու համար

Ստորեւ կու տանք Ամենայն հայոց Գարեգին Բ. կաթողիկոսի ուղերձը, որ ան հայ ժողովուրդին ուղղեց Հայաստանի Հանրապետութեան վերանկախացման 32-ամեակին առիթով Ս. Էջմիածինի մէջ կատարուած Հանրապետական մաղթանքի ընթացքին:

«Սիրելի՛ բարեպաշտ ժողովուրդ,

Այսօր համախմբուել ենք սրբազան այս կամարների ներքոյ միասնական աղօթք մատուցելու առ Աստուած Հայաստան եւ Արցախ նուիրական մեր հայրենիքի խաղաղութեան եւ մեր ժողովրդի անվտանգ կեանքի համար:

Հայոց անկախ պետականութեան վերակերտման երեսուներկուերորդ տարեդարձը դիմաւորում ենք մեծ տագնապների ու անհանգստութիւնների եւ նոր կորուստների ցաւի մէջ: Մեր մտքերն ուղղուած են հայրենի Արցախ աշխարհին, որտեղ տեւական ահաբեկումներից, բռնաճնշումներից եւ աւելի քան ինը ամիսների ամբողջական շրջափակումից յետոյ Ազրպէյճանը ռազմական լայնածաւալ գործողութիւններ վերսկսեց` շարունակելով ցեղասպան իր քաղաքականութիւնը արիւնալի ոճրագործութիւններով:

Մեր ժողովուրդը Արցախում այսօր կանգնած է գոյաբանական սոսկալի սպառնալիքների առջեւ: Հարիւր տարի անց քաղաքակիրթ աշխարհի հայեացքի ներքոյ մեր ժողովուրդը վերստին ճաշակում է դառնութիւնը ցեղասպանութեան: Վերստին ազատ ու անկախ կեանքի ու ազգային պատկանելիութեան համար հայը վճարում է իր կեանքով ու իր արեամբ:

Մենք հրաժարւում ենք հաւատալ, որ քսանմէկերորդ դարի աշխարհում շարունակում է գործել ուժի իրաւունքը, հրաժարւում ենք հաւատալ, որ աշխարհի առաջնորդները չեն կարող միջոցներ գտնել կանխելու համար եղեռնագործութիւնը Արցախում: Մեր կոչն ենք ուղղում միջազգային կառոյցներին, բարեկամ պետութիւնների ղեկավարներին` անյետաձգելի եւ առաւել ազդու միջոցներ գործադրելու Ազրպէյճանի ցեղասպան գործողութիւնները կասեցնելու համար: Կոչ ենք ուղղում մեր երկրի իշխանութիւններին, ազգային կառոյցներին, քաղաքական, հասարակական գործիչներին` ամէն ջանք ներդնելու արցախահայութեանը նոր պատուհասներից փրկելու համար: Ազգային մեր կեանքում երկպառակութիւնը, կործանարար անտարբերութիւնը, քաղաքական ներհակութիւնները, հասարակական բեւեռացուածութեան պատճառով համախմբուելու անկարողութիւնը նորանոր հարուածներ պիտի հասցնեն մեր ազգին եւ հայրենի պետականութեանը: Մեզ պէտք է միաբանութիւն` փորձութիւնները յաղթահարելու եւ վերյառնելու համար, անդաւաճան հայրենանուիրում` պետութեան անվտանգութիւնն ապահովելու եւ հզօրանալու համար, պատասխանատուութիւն ու բարձր գիտակցութիւն` համազգային ու պետական մեր շահերի պաշտպանութեան եւ նուիրական իղձերի իրականացման համար:

Արցախի հաւատաւոր սիրելի՛ զաւակներ, հայրական Մեր օրհնութիւնն ու աղօթքն ենք բերում ձեզ եւ Մեր զօրակցութիւնը յայտնում Արցախի իշխանութիւններին: Ծանր պատասխանատուութեան առջեւ էք կանգնած եւ, ցաւօք, միայնակ էք կրում ձեր տառապանաց խաչը: Մեր ցաւն ու վիշտն ընդհանուր է, մեր կորուստների եւ հայրենի երկրին հասցուած դաժան հարուածների դառնութիւնն ու տխրութիւնը ամէնքիս սրտերում են: Վճռական այս պահին թող Աստուած ապաւէն լինի, մխիթարի ու գոտեպնդի ձեզ` դիմակայելու նեղութիւններին ու դժուարութիւններին, եւ Տիրոջ ողորմութեամբ ձեր եւ ձեր զաւակների կեանքի ընթացքը լինի անվտանգ ու ապահով: Այս ծանր իրավիճակում, մեր պատմութեան փոթորկայոյզ ժամանակները յաղթահարած մեր նախնեաց օրինակով, յոյսով եւ հաւատով զինուենք ու զօրանանք` ըստ սաղմոսերգուի խօսքի. «Եթէ նոյնիսկ անցնեմ մահուան ստուերների միջով, չեմ վախենայ չարից, քանզի դու, Տէր, ինձ հետ ես» (Սաղմ. 22.5):

Սիրելի՛ ժողովուրդ ի Հայաստան, Արցախ եւ ի սփիւռս, միասնաբար աղօթք բարձրացնենք առ երկնաւոր Տէրը` հայցելով, որ Բարձրեալն Աստուած խաղաղութեան Իր շնորհները հեղի հայոց աշխարհին, ամուր ու հաստատուն պահի հայոց պետականութիւնը եւ ազգասիրութեան ու հայրենասիրութեան մէջ` վճռական ու անսասան մեր ժողովրդին:

Տիրոջ սէրը, շնորհը եւ խաղաղութիւնը թող լինեն մեզ հետ այժմ եւ միշտ. Ամէն»: