Ատրպէյճանցիները Հակարիի կամուրջին ուղղութեամբ յառաջխաղացքի փորձ կատարեցին

15 Յունիսի առաւօտուն, Հայաստան-Արցախ սահմանագիծին վրայ՝ Հակարիի կամուրջի տարածքին մէջ լսուեցան կրակոցներ: Ժամը 8:40-ի սահմաններուն մէջ ազրպէյճանցի խումբ մը սահմանապահ զինուորներ յառաջխաղացման փորձ կատարած են կամուրջի ուղղութեամբ` փորձած են Հայաստանի տարածքին մէջ դրօշ տեղադրել: Հայաստանի սահմանապահ ծառայութենէն տեղեկացուցած են, որ ձեռնարկուած միջոցներուն շնորհիւ ազրպէյճանցի զինուորներու յառաջխաղացման եւ դրօշ տեղադրելու փորձը կանխուած է: Աւելի ուշ տարածուեցաւ տեսանիւթ մը, որու մէջ կ՛երեւի, թէ ինչպէս ազրպէյճանցիները, ենթադրաբար, ռուս խաղաղապահներու ուղեկցութեամբ կ՛անցնին կամուրջը, Հայաստանի տարածք կը մտնեն, դրօշը ձողով կը փորձեն ամրացնել, ապա բոլորը կը ցրուին` հայկական դիրքէ արձակուած կրակոցէն ետք:

Պաշտօնական Պաքուն դրօշի տեղադրման ջանքերուն մասին չի խօսիր, այլ կը հաղորդէ, որ Հայաստանի տարածքէն կրակած են Հակարիի անցակէտին ուղղութեամբ, ազրպէյճանցի սահմանապահ մը վիրաւորուած է:

Օրուան ընթացքին տարածուեցաւ այլ տեսանիւթ մը, ուր ազրպէյճանական դրօշը կը բարձրացուի նոյն հատուածին մէջ` այս անգամ պատկերներէն դատելով` ռուս խաղաղապահ զօրակազմի հրամանատար Լենցովի ներկայութեամբ: Թէ այս փորձը ինչո՛վ աւարտած է` յայտնի չէ: Փաստը այն է, որ այս պահուն կամուրջէն դէպի Սիւնիքի մարզ բերող հատուածին մէջ ազրպէյճանական դրօշ չկայ, կայ դրօշի ձողը:

Երէկ առաւօտեան Հակարիի կամուրջին մօտ տեղի ունեցած ազրպէյճանական սադրանքէն ետք Բերձորի միջանցքով բոլոր մարդասիրական ուղեւորափոխադրումներն ու բեռնափոխադրումները Ազրպէյճանի կողմէ արգիլուած են: Այս մասին կը յայտնէ Արցախի տեղեկատուական շտապը:

«Մասնաւորաբար, Կարմիր խաչի միջազգային կոմիտէին կողմէ 25 հիւանդ եւ անոնց հարազատներ կը տեղափոխուէին Արցախէն Հայաստան, սակայն Քաշաթաղի միջանցքին մէջ գործող ապօրինի ազրպէյճանական անցակէտին մէջ արգիլուած է մեքենաներու հետագայ տեղաշարժը` անոնց ստիպելով վերադառնալ Ստեփանակերտ:

«Բացի ատկէ, չեղեալ նկատուած է այսօր նախատեսուած Ստեփանակերտ-Գորիս-Ստեփանակերտ երթուղիով տասնեակ անձերու ուղեւորափոխադրումը մարդասիրական հրատապ կարիքներէն մեկնելով, անիկա պէտք է տեղի ունենար ռուս խաղաղապահներու կողմէ:

«Կասեցուած է նաեւ մարդասիրական բեռնափոխադրման նպատակով Գորիս մեկնող ռուս խաղաղապահներու բեռնատարներու շարժը:

«Արցախի Հանրապետութեան իշխանութիւնները հերթական անգամ կ՛արձանագրեն, որ Քաշաթաղի միջանցքին մէջ տեղադրուած ապօրինի ազրպէյճանական անցակէտը ինքնին մեծագոյն վտանգ ու խոչընդոտ է Արցախի եւ Հայաստանի միջեւ ազատ տեղաշարժի ապահովման հարցին մէջ: Այսօրուան միջադէպը վերստին կը հաստատէ այդ վտանգներու եւ խոչընդոտներու գոյութիւնը` լրացուցիչ կերպով սպառնալիքի տակ դնելով Արցախի ժողովուրդի սուր մարդասիրական կարիքներուն համար նոյնիսկ Կարմիր խաչի եւ ռուս խաղաղապահներու կողմէ մարդոց ու բեռներու խիստ սահմանափակ տեղաշարժը:

«Արցախի իշխանութիւնները կը վերահաստատեն իրենց դիրքորոշումը, որ անյապաղ ու անվերապահ կերպով պէտք է ապահովուի 9 նոյեմբեր 2020-ի եռակողմ յայտարարութեամբ նախատեսուած Լաչինի միջանցքի դրութիւնը առանց ազրպէյճանական որեւէ միջամտութեան, ինչպէս նաեւ պէտք է կատարուի ՄԱԿ-ի Արդարադատութեան միջազգային դատարանի 22 փետրուար 2023-ի որոշումը այդ հարցին վերաբերեալ»:

Աղբիւրը` Ազդակ