Ստեփանակերտ մերժեց Ատրպէյճանի` Պաքուի մէջ հանդիպում ունենալու առաջարկը
Արցախի արտաքին գործոց նախարարութիւնը յայտարարութեամբ մը պատասխանեց Արցախի Հանրապետութեան ներկայացուցիչներուն հետ Պաքուի մէջ հանդիպում ունենալու՝ Ատրպէյճանի առաջարկին:
Պաշտօնական Ստեփանակերտ յայտարարութիւն մը տարածելթվ՝ մերժեց Պաքուի մէջ հանդիպելու եւ համարկման հարցեր քննարկելու՝ Ատրպէյճանի առաջարկը, վերահաստատելով, որ պատրաստ են հանդիպիլ Ատրպէյճանի ներկայացուցիչներուն հետ, բայց Արցախի մէջ Ռուսիոյ խաղաղապահ առաքելութեան միջնորդութեամբ եւ անոնց հրամանատարութեան տեղակայման վայրին մէջ՝ քննելու Լաչինի միջանցքի անխափան գործունէութեան վերաբերեալ հարցերը:
«Ադրբեջանի եւ Արցախի ներկայացուցիչների միջեւ Բաքւում Ապրիլի սկզբին հանդիպում անցկացնելու վերաբերեալ Ադրբեջանի նախագահի աշխատակազմի հերթական առաջարկութեան կապակցութեամբ անհրաժեշտ ենք համարում վերահաստատել Արցախի Հանրապետութեան իշխանութիւնների սկզբունքային դիրքորոշումն ադրբեջանական կողմի հետ հնարաւոր քննարկումների, դրանց կազմակերպման եղանակների եւ նպատակների վերաբերեալ: Արցախի Հանրապետութիւնը մշտապէս հանդէս է եկել եւ շարունակում է հանդէս գալ երկխօսութեան եւ առկայ բոլոր խնդիրների խաղաղ, բանակցային ճանապարհով լուծման օգտին: Մենք երբեք չենք հրաժարուել ադրբեջանական կողմի հետ շփումներից, որի ապացոյցն են Արցախի եւ Ադրբեջանի ներկայացուցիչների միջեւ անցկացուած հանդիպումներն Արցախում տեղակայուած ՌԴ խաղաղապահ զօրակազմի հրամանատարութեան միջնորդութեամբ: Հանդիպման վայրի եւ օրակարգի հետ կապուած ադրբեջանական կողմի հնչեցրած պայմանները, ինչպէս նաեւ համատեքստը, որում ներկայացուել է տուեալ առաջարկը, վկայում են, որ Ադրբեջանի իշխանութիւնների նպատակը ոչ թէ առկայ խնդիրների շուրջ իրական քննարկումն է, այլ հնարաւոր երկխօսութեան խաթարումը կամ հարկադրանքի, շրջափակման, կեանքի անտանելի պայմանների ստեղծման եւ ռազմական ուժի կիրառման միջոցով սեփական քաղաքական օրակարգի պարտադրումը: Այդ կապակցութեամբ հարկ ենք համարում յիշեցնել, որ երեք օր առաջ` Մարտի 25ին, Ադրբեջանի զինուած ուժերը, կոպտօրէն խախտելով 2020 թ. Նոյեմբերի 9ի եռակողմ յայտարարութեան դրոյթները, հատել են շփման գիծը եւ առաջխաղացում կատարել դէպի Արցախի Հանրապետութեան տարածքի խորքը` Ստեփանակերտ-Լիսագոր գրունտային ճանապարհի ուղղութեամբ: Աւելին, Մարտի 27ին, Ադրբեջանի զինուած ուժերը եւս մէկ անգամ փորձել են վերահսկողութեան տակ առնել նշուած ճանապարհը, որը Շուշիի շրջանի համայնքների եւ Հանրապետութեան այլ բնակավայրերի միջեւ արտակարգ կապի միակ հնարաւորութիւնն է շրջափակման պայմաններում: Վերահաստատում ենք մեր պատրաստակամութիւնը, նախորդ հանդիպումների անցկացման արդէն իսկ ձեւաւորուած պրակտիկայի (կիրառման) համաձայն, Արցախում ՌԴ խաղաղապահ առաքելութեան միջնորդութեամբ եւ նրանց հրամանատարութեան տեղակայման վայրում հանդիպել Ադրբեջանի ներկայացուցիչների հետ` քննարկելու Արցախի ժողովրդի բնականոն կենսագործունէութեան ապահովման եւ կողմերի ստանձնած պարտաւորութիւնների պատշաճ իրականացման, մասնաւորապէս, Լաչինի միջանցքի անխափան գործունէութեան հետ կապուած հարցերը: Այս համատեքստում առաջնահերթ ենք համարում Լաչինի միջանցքով Արցախը Հայաստանին կապող միակ ճանապարհի վերաբացման եւ շրջափակման հետեւանքով առաջացած հումանիտար (մարդասիրական), ենթակառուցուածքային եւ այլ հրատապ խնդիրների լուծումը: Արցախի իշխանութիւնները բաց են նաեւ այլ հարցերի քննարկման համար, որն ուղղուած կը լինի ոչ թէ ադրբեջանական կողմի պատրաստի լուծումների պարտադրմանը, այլ իրավիճակի կայունացման եւ լարուածութեան յետագայ սրումը կանխելու ուղղութեամբ փոխադարձ ընդունելի լուծումների որոնմանը: Կրկին ընդգծում ենք, որ Լաչինի միջանցքի շրջափակման շարունակումը եւ Արցախում հումանիտար ճգնաժամի սաստկացումն անընդունելի են եւ ոչ մի կերպ չեն նպաստում երկխօսութեան համար բարենպաստ մթնոլորտի ձեւաւորմանը: Համոզուած ենք, որ միայն Ադրբեջանի կողմից իր միջազգային պարտաւորութիւնների պատշաճ կատարումը, ինչպէս 2020 թուականի Նոյեմբերի 9ի Եռակողմ յայտարարութեան, այնպէս էլ Արդարադատութեան միջազգային դատարանի 2023 թուականի Փետրուարի 22ի վճռի համաձայն, կարող է վկայել առանց հարկադրանքի եւ ուժի կիրառման, երկխօսութեան եւ բանակցութիւնների միջոցով, խնդիրները լուծելու Ադրբեջանի պատրաստակամութեան եւ շահագրգռուածութեան մասին:
Եւս մէկ անգամ շեշտում ենք տեխնիկական եւ հումանիտար (մարդասիրական) հարցերի լուծման շուրջ երկխօսութեան քաղաքականացման անթոյլատրելիութիւնը եւ ընդգծում, որ ադրբեջանա-ղարաբաղեան հակամարտութեան կարգաւորման քաղաքական հարցերը պէտք է քննարկուեն համաձայնեցուած եւ միջազգայնօրէն ճանաչուած բանակցային ձեւաչափում` կողմերի իրաւահաւասարութեան հիման վրայ եւ նրանց ստանձնած պարտաւորութիւնների կատարման միջազգային ամուր երաշխիքների առկայութեան պայմաններում», կ՛ըսուի վերոնշեալ յայտարարութեան մէջ։
Աղբիւրը՝ Ասպարէզ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
