Լիբանանի մէջ տնտեսական տագնապը աւելի եւս կը սաստկանայ

Լիբանանի մէջ ամէն բան տակաւին կը մնայ անորոշ. տնտեսական, ելեւմտական, ընկերային եւ քաղաքական տագնապները աւելի եւս կը սաստկանան` լիբանանցի քաղաքացին մղելով յաւելեալ յուսալքումի:

Այս շրջագիծին մէջ, հանգստեան կոչուած բանակայինները երէկ առաւօտեան գործադրեցին բողոքի ցոյց մը, Ռիատ Սոլհ հրապարակին վրայ:

Անոնք կտրականապէս մերժեցին ելեւմուտքի նախարարութեան վաւերացուցած աշխատավարձի յաւելումի ծրագիրը:

Բազմամարդ ցոյցին մասնակիցները ուղղուեցան Կեդրոնական դրամատուն, ուր բանակն ու Ներքին ապահովութեան ուժերը արդէն իսկ դիրքաւորուած էին եւ կազմ ու պատրաստ կը սպասէին պաշտպանելու Կեդրոնական դրամատան անվտանգութիւնը:

Ցասկոտ ցուցարարները յարձակեցան Կեդրոնական դրամատան վրայ` փորձելով դարպասներէն ներս խուժել, սակայն անոնք բախեցան անոր մուտքին կանգնած բանակայիններուն:

Կեդրոնական դրամատան դիմաց երկարատեւ հրմշտուք եւ բախումներ արձանագրուեցան հանգստեան կոչուած բանակայիններուն եւ ներկայ բանակայիններուն, ինչպէս նաեւ Ներքին ապահովութեան ուժերուն միջեւ:

Կէսօրուան ժամ 12:00-էն մինչեւ 2:30 տեւած ցոյցին ընթացքին ցուցարարները հրկիզուող անիւներով փակեցին Կեդրոնական դրամատունէն Համրա տանող ճամբան` ստեղծելով երթեւեկի ահաւոր խճողում: Ապա անոնք ցրուեցան:

Մինչ հանգստեան կոչուած բանակայինները գետնի վրայ կը փորձէին քանդել Կեդրոնական դրամատան փշաթելերը եւ ներս մուտք գործելու փորձեր կատարել, հաղորդակցութեան միջոցներու մարզը կը շարունակէ ապրիլ «քարէ դար» վերադարձի իր դարաշրջանը:

Այս շրջագիծին մէջ, հաղորդակցութեան միջոցներու նախարարի պաշտօնակատար Ճոնի Քըրըմ յայտնեց, որ ինք խորհրդակցած է վարչապետի պաշտօնակատար Նեժիպ Միքաթիի հետ, որ խորհուրդ տուած է բանակին տրամադրութեան տակ դնել ընկերութիւնը:

Բան մը, որ Քըրըմ մերժած է` շեշտելով, որ ինք պաշտօնեաները պատանդներու չի վերածեր:

«Օժերօ»-ի պաշտօնէութեան գործադիր խորհուրդը հաստատեց, որ լիբանանեան բանակը հայրենիքը պաշտպանող ուժն է, եւ մեր բոլոր կեդրոնները անոնց դիմաց բաց են:

Քըրըմ ընդգծեց, որ այս ընթացքով «Թաչ» եւ «Ալֆա» բջիջային հեռաձայնի ընկերութիւններուն աշխատանքը կրնայ դադրիլ, եւ կոչ ուղղեց կառավարութեան` ամէնէն արագ ժամանակամիջոցին նիստ մը գումարելու:

Ան կոչ ուղղեց «Օժերօ»-ի պաշտօնէութեան սենտիքային վերջ տալու իրենց յայտարարած գործադուլին եւ վերադառնալու բանակցութիւններուն ու երկխօսութեան, որոնք լուծման յանգեցնող լաւագոյն ձեւերն են:

Միւս կողմէ, ապրուստի սղաճի համեմատութիւնը ճշդող յանձնախումբը գումարեց իր նիստը` նախագահութեամբ աշխատանքի նախարարի պաշտօնակատար Մուսթաֆա Պայրամի:

Նիստէն ետք Պայրամ յայտնեց, որ յանձնախումբին հետ համաձայնած է, որ սեփական մարզի պաշտօնեաներուն ամսական նուազագոյն աշխատավարձը հասնի 9 միլիոն լ. ոսկիի, այսինքն` 4,5 միլիոն լ. ոսկիի յաւելում մը ճշդուի անոնց համար:

Ան աւելցուց նաեւ, որ համաձայնութիւն գոյացած է աշխատանքային իւրաքանչիւր օրուան համար 250 հազար լ. ոսկիի փոխադրածախս մը տրամադրել:

Պայրամ յայտնեց, որ յաւելումի այս որոշումները ուղղակիօրէն առնչուած պիտի ըլլան վերատեսութեան` նկատի ունենալով ամերիկեան տոլարի փոխարժէքի սակը:

Պայրամ յայտնեց, որ այս լուծումը պիտի ներկայացնեն Պետական շուրային եւ ապա ներկայացնեն կառավարութեան գումարելիք յաջորդ նիստին, որպէսզի կարելի ըլլայ զայն վաւերացնել եւ գործադրել:

Աղբիւրը` Ազդակ