Արցախի մէջ, ռազմական դրութեան պարագային, Ազգային Ժողովը նախագահ պիտի ընտրէ. Որոշումը ընդունուեցաւ առաջին ընթերցումով
Արցախի մէջ ռազմական դրութեան պարագային նախագահ ընտրելու իրաւունքը պիտի վերապահուի Ազգային ժողովին. Արցախի խորհրդարանը երէկ առաջին ընթերցումով, միաձայն ընդունեց Սահմանադրութեան փոփոխութեան մասին նախագիծը:
Նախագիծին վերաբերեալ գրաւոր առաջարկներու ներկայացման ժամկէտ սահմանուած է մինչեւ 21 մարտ:
Փոփոխութիւններու նախաձեռնութիւնը նախագահ Արայիկ Յարութիւնեանինն է:
Գործող Սահմանադրութեամբ, նախագահի հրաժարականի, մահուան, լիազօրութիւններու դադրեցման կամ անոր անվստահութիւն յայտնելու, պաշտօնանկ ընելու պարագային խորհրդարանը կը լուծարուի, նախագահի եւ Ազգային ժողովի արտահերթ ընտրութիւններ կը կատարուին:
Առաջարկուող փոփոխութեամբ, կարելի պիտի ըլլայ խուսափիլ Ազգային ժողովի լուծարումէն, վերջինս պիտի շարունակէ գործել եւ պիտի կարենայ նախագահ ընտրել:
Աղբիւրը` Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
