Սուրիական կարմիր մահիկը արեւմուտքին կոչ կ՛ուղղէ` ջնջելու Սուրիոյ դէմ հաստատուած պատժամիջոցները
Սուրիական կարմիր մահիկը կոչ կ՛ուղղէ` վերցնելու Սուրիոյ դէմ հաստատուած միակողմանի պատժամիջոցները` երկրաշարժի հետեւանքները վերացնելու համար:
Կազմակերպութեան ղեկավար Խալետ Հպուպաթի Դամասկոսի մէջ մամլոյ ասուլիսի ընթացքին յայտարարեց, որ Սուրիոյ յատուկ մեքենաներու եւ սարքաւորումներու մատակարարում անհրաժեշտ է:
«Մենք կոչ կ՛ուղղենք ջնջելու Սուրիոյ նկատմամբ հաստատուած շրջափակումը եւ տնտեսական պատժամիջոցները` աւերիչ երկրաշարժի հետեւանքները վերացնելու համար… Մեզի անհրաժեշտ են ծանր սարքաւորումներ, շտապօգնութեան մեքենաներ եւ հրշէջ մեքենաներ` որոնողափրկարարական աշխատանքները արագացնելու նպատակով:
«Ատոր համար անհրաժեշտ է, որ որքան կարելի է շուտ, վերցուին Սուրիոյ դէմ հաստատուած պատժամիջոցները», ըսաւ Հպուպաթի:
Միջազգային Կարմիր խաչի յանձնախումբը երէկ իր կարգին նշեց. «Սուրիոյ մէջ մարդասիրական կացութիւնը ահաւոր է, եւ ասիկա իրողութիւն մըն է, զոր կարելի չէ անտեսել»:
Նշենք, որ Սուրիոյ մէջ երկրաշարժի զոհերուն թիւը բարձրացաւ 2150-ի, իսկ վիրաւորներունը` 3649-ի:
«Սքայ Նիուզ» հաղորդեց, որ Եգիպտոսի նախագահ Ապտել Ֆաթթահ Սիսի հեռաձայնային հաղորդակցութիւն ունեցած է Սուրիոյ նախագահ Պաշշար Ասատի հետ, ինչպէս նաեւ ցուցմունք տուած է Սուրիոյ մէջ երկրաշարժէն տուժածներու փրկութեան ջանքերուն ամբողջական աջակցութիւն տրամադրելու:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
