Իսրայէլ Երուսաղէմի մէջ Պաղեստինցիներու բնակարաններ քանդեց
Իսրայէլեան լրատուամիջոցներ երէկ հաղորդեցին, որ իսրայէլեան պուլտոզըրներ երէկ առաւօտուն սկսած են բռնագրաւեալ Երուսաղէմի Ժապալ Մուքապեր շրջանին մէջ պաղեստինցիներու պատկանող տուներ քանդել` այն պատրուակով, որ ապօրինի կերպով կառուցուած են:
Ըստ իսրայէլեան լրատուամիջոցներուն, «իւրաքանչիւր տուն, որ ապօրինի կերպով եւ առանց նախապէս արտօնագիր ստացած ըլլալու կառուցուած է, պիտի քանդուի»:
Տեղական լրատուամիջոցներ նախապէս հաղորդած էին, որ իսրայէլեան պուլտոզըրները սկիզբը ձախողած են նշեալ վայր հասնիլ, որովհետեւ շրջանի բնակիչները ճամբուն վրայ ձէթ թափած են` փորձելով արգելք հանդիսանալ, որ Իսրայէլ բնակարանները քանդէ:
Իսրայէլեան իշխանութիւնները նախքան այդ Երուսաղէմի Թուր գիւղի իրենց բնակարանէն հեռացուցած էին Ալքամ ընտանիքը, որպէսզի պաղեստինցիներու դէմ հաւաքական պատժամիջոցներու ծիրին մէջ քանդեն անոնց տունը:
Նշենք, որ Իսրայէլի նախարարաց խորհուրդը շաբաթ օր որոշած էր փակել Երուսաղէմի Նաւէ Եաաքով բնակեցման վայրին մէջ կատարուած գործողութեան հեղինակ Խէյրի Ալքամի տունը: Ներքին գաղտնի սպասարկութիւնը` Շապաքն ու իսրայէլեան բանակը զօրակցած էին Իսրայէլի ներքին գործոց նախարար Իթամար պեն Ղաֆիրի` պաղեստինեան գործողութիւններու հեղինակներու բնակարանները փակելու որոշումին` հակառակ կառավարութեան իրաւաբանական խորհրդատուի ընդդիմութեան:
Ալքամ ուրբաթ գիշեր Երուսաղէմի հիւսիսին մէջ գործողութիւն մը կատարելով սպաննած էր 7 իսրայէլացիներ եւ երեք ուրիշներ վիրաւորած:
Իսրայէլեան լրատուամիջոցներ երէկ հաղորդեցին, որ Քալքիլիայի արեւելքը գտնուող Քատոմիմ բնակեցման վայրին մօտ սպաննուած է պաղեստինցի երիտասարդ մը, որ իբրեւ թէ կը փորձէր գործողութիւն կատարել:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
