Թուրքիան եւ Ազրպէյճանը, ցանկանալով Հայաստանէն «Զանգեզուրի միջանցք» ստանալ՝ պատերազմով, բռնագրաւմամբ եւ ցեղասպանութեամբ կը սպառնան Հայաստանին․ Լեմգինի հիմնարկ

2022-ին Հայաստանի Հանրապետութեան տարածքային ամբողջականութիւնը սպառնալիքի տակ դրուած է հարեւան ազրպէյճանի եւ անոր դաշնակից թուրքիոյ կողմէ: Այս մասին, ըստ «ԵՐԿԻՐ»-ի, ըսուած է Ցեղասպանութեան կանխարգիլման Լեմգինի հիմնարկի՝ 2022 թուականի ամփոփիչ զեկոյցին մէջ։

Զեկոյցով ներկայացուած են ՀՀ-ին եւ Արցախին վերաբերող հետաքրքրական դիտարկումներ։ Ներկայացուած են 44-օրեայ պատերազմէն ետք ազրպէյճանի կողմէ հրադադարի մշտական խախտումները, ինչպէս նաեւ Սեպտեմբերին ազրպէյճանի իրականացուցած յարձակումը Հայաստանի դէմ, հայ ռազմագերիներու հանդէպ վայրագութիւնները:

«Թէեւ արտաքին աշխարհը արագ արձագանգեց՝ վերջ դնելու ազրպէյճանի սեպտեմբերեան յարձակման, սակայն Հայաստանի ինքնիշխան տարածքի 140 քառակուսի քիլոմեթրը, ինչպէս նաեւ Արցախի կարեւոր հատուածները, ներառեալ՝ Շուշի քաղաքը, դեռ գրաւուած են ազրպէյճանի կողմէ»,- նշուած է զեկոյցին մէջ:

Հիմնարկը նաեւ կը յայտնէ, որ Դեկտեմբեր 12-էն ազրպէյճանը փակած է Արցախը արտաքին աշխարհին կապող միակ ճանապարհը՝ յառաջացնելով մարդասիրական ճգնաժամ, որ կրնայ արագ վերածուիլ աղէտի:

«ազրպէյճանի նախագահ Իլհամ Ալիեւին վարչակարգը երկրին մէջ բացայայտ կերպով կը վարէ դաժան հակահայկական քաղաքականութիւն՝ տօնելով պատերազմական յանցագործութիւնները եւ միեւնոյն ժամանակ արտաքին աշխարհին ներկայանալով որպէս հանդուրժողականութեան պատնէշ»,- գրած են Լեմգինի հիմնարկի փորձագէտները՝ աւելցնելով, որ թուրքիան եւ ազրպէյճանը, ցանկանալով Հայաստանէն ստանալ «Զանգեզուրի միջանցք», Հայաստանին կը սպառնան պատերազմով, բռնագրաւմամբ եւ ցեղասպանութեամբ:

Հիմնարկը ուշադրութիւն կը հրաւիրէ այն բանի վրայ, որ հզօր երկիրները, ինչպէս նաեւ Եւրոպական Միութիւնը, ՆԱԹՕ-ն եւ այլ կառոյցներ կը շարունակեն բացայայտ կերպով աջակցիլ թուրքիոյ եւ ազրպէյճանի վարչակարգերուն:

«ազրպէյճանը Freedom House-ի կողմէ ճանչցուած է որպէս աշխարհի ամենաքիչ ազատ երկիրներէն մէկը: Վերջին տարիներու ընթացքին այնտեղ աւելցած են լրագրողներու, մարդու իրաւունքներու պաշտպաններու, ցեղական փոքրամասնութիւններու եւ քաղաքացիական հասարակութեան հանդէպ հալածանքները՝ այլախոհութիւնը վերացնելու համար օգտագործելով ներքին, ինչպէս նաեւ անդրազգային բռնաճնշումներ»,- կ՝եզրափակեն փորձագէտները:

Աղբիւրը՝ Եռագոյն