Միքաթի ցաւակցութիւն կը յայտնէ Պենետիկտոս ԺԶ. Պապին վախճանելուն առիթով
Վարչապետի պաշտօնակատար Նեժիպ Միքաթի ցաւակցագիր մը յղեց Ֆրանչիսկոս պապին` խոր կսկիծ յայտնելով Պենետիկտոս ԺԶ. նախկին պապին վախճանումին առիթով:
Միքաթի շեշտեց, որ Պենետիկտոս ԺԶ. պապը կրօններու երկխօսութեան անձնաւորութիւն էր, որ բարեկամ էր Լիբանանին եւ լիբանանցիներուն:
Այս առիթով Միքաթի հեռաձայնային հաղորդակցութիւն մը ունեցաւ նաեւ մարոնի համայնքի Պշարա Ռայի պատրիարքին հետ եւ անոր ցաւակցութիւն յայտնեց:
Միւս կողմէ, արտաքին գործոց եւ արտերկրի լիբանանցիներու հարցերու նախարարութիւնը հրապարակեց հաղորդագրութիւն մը, որուն մէջ կը նշուէր, թէ Լիբանան ցաւակցութիւն կը յայտնէ կաթողիկէ եկեղեցւոյ զաւակներուն` Պենետիկտոս ԺԶ. պապին վախճանումին առիթով:
Այս առիթով նախարարութեան հաղորդագրութեան մէջ ընդգծուեցաւ, որ 2012-ին Պենետիկտոս ԺԶ. պապին Լիբանան այցելութիւնը եղած է պատմական եւ հանգստութիւն պարգեւած է լիբանանցիներու հոգիներուն: «Պենետիկտոս ԺԶ. պապը կը յարգէր Լիբանանը եւ զայն կը նկատէր մարդկութեան` իր կրօններու բազմազանութեամբ, ուղղուած յոյսի եւ խաղաղութեան պատգամի երկիր մը», կը նշէ հաղորդագրութիւնը:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
