«Իրաւունք չունիք հանրապետութեան նախագահ չընտրելու» Հաստատեց Ռայի Պատրիարքը

Մարոնի համայնքի Պշարա Ռայի պատրիարքը Յորդանան կատարած իր հովուապետական այցելութեան ընթացքին իր խօսքը ուղղելով լիբանանցի պատասխանատուներուն ըսաւ. «Հանրապետութեան նախագահ չընտրելու իրաւունք չունիք: Իրաւունք չունիք քաղաքակիրթ երկիր մը քանդելու, անոր ժողովուրդը աղքատացնելու ու պատճառ դառնալու վերջինիս արտագաղթին: Իրաւունք չունիք հանգիստ քնանալու, երբ տոլարի փոխարժէքը 41.000 լ. ոսկին անցած է, այլ պէտք է իմանաք, որ քաղաքականութիւնը արժանապատիւ արուեստ մըն է` ծառայելու հանրութեան»:

Ռայի պատրիարքը շեշտեց, որ Լիբանան կը տառապի վճռական որոշումներ տուող իշխանութեան բացակայութենէն, եւ այդ պատճառով ալ ան կը տառապի տնտեսական հսկայ բեռէ մը, իսկ անոր ժողովրդագրական ինքնութիւնը սպառնալիքի ենթակայ է` լիբանանեան հողերուն վրայ ապրող կէս միլիոն պաղեստինցի գաղթականներուն եւ մէկուկէս միլիոն սուրիացի տեղահանուածներուն պատճառով:

Ռայի պատրիարքը Յորդանանէն խնդրեց ՄԱԿ-ի հովանաւորութեամբ խորհրդաժողով մը կազմակերպել` քննարկելու համար Թաէֆի համաձայնագիրին գործադրութեան ձեւերը, Ապահովութեան խորհուրդի թիւ 1680, 1559 եւ 1701 բանաձեւերու գործադրութեան գործիքակազմը, լուծելու համար պաղեստինցի գաղթականներու եւ սուրիացի տեղահանուածներու թղթածրարը, ինչպէս նաեւ յայտարարելու Լիբանանի չէզոքութիւնը:

Աղբիւրը Ազդակ