Աշխարհէն հեռացաւ Մեթր Ժագ Ջուխատարեանը

Վատիկան Նիուզ - Հայկական Բաժանմունք

Հայ կաթողիկէ Պատրիարքութիւնը կը գուժէ մահը իր հարազատ զաւկին, նախկին նախարար եւ երեսփոխան, ինչպէս նաեւ Հայ Կաթողիկէ Աղքատախնամ Միութեան նախագահ ՝ մեթր Ժագ Ջուխատարեանին, որ պատահեցաւ Հինգշաբթի 15 Դեկտեմբեր 2022-ին յետ երկարատեւ հիւանդութեան, ամբողջացնելով 88-ամեայ արդիւնաւէտ կեանք մը:

Թաղման արարողութիւնը տեղի պիտի ունենայ Շաբաթ 17 Դեկտեմբեր 2022-ին Ս. Գրիգոր Լուսաւորիչ – Ս. Եղեա Աթոռանիստ եկեղեցւոյ Մէջ:

Արարողութիւնը պիտի նախագահէ ամենապատիւ եւ գերերջանիկ Տէր Ռաֆայէլ-Պետրոս ԻԱ. Պատրիարք- Կաթողիկոս Կաթողիկէ Հայոց:

Մեթր Ժագ Ջուխատարեան

Հակիրճ կենսագրական

Մեթր Յակոբ Ջուխատարեան, ծնած է Պէյրութ 24 Մարտ 1934-ին: Նախնական եւ երկրորդական ուսումը ստացած է Ֆրերներու դպրոցը Ճմէյզի: 1954-ին  արձանագրուած է Յիսուսեան համալսարանը մասնագիտանալով իրաւաբանութեան մէջ, եւ որմէ շրջանաւարտ եղած է 1958 թուականին:

Երիտասարդ տարիքին ան աշխատած է լիբանանեան մաքսային վարչութեան մէջ, ապա փաստաբանի վկայականը ստանալով, ան միացած է լիբանանի փաստաբաններու սենտիքային, որմէ ետք փորձառական շրջան մը անցնելէ ետք մեթր Անթուան Քազանի մօտ,  իր անձնական գրասենեակը հիմնած է 1963-ին:

Ան Պէյրութի Հայ Կաթողիկէ համայնքի երեսփոխան ընտրուած է 1992 եւ 1996 թուականներուն: Մասնակցած է լիբանանեան խորհրդարանի տարբեր յանձնախումբերու:

24 Դեկտեմբեր 1990-ին Օմար Քարամի կառավարութեան մէջ կենսոլորտի գործերու պետական նախարար նշանակուած է:  Կենսոլորտի հարցերով զբաղող տարբեր համագումարներու մասնակցած է:

Ան անդամակցած եւ ապա նախագահած է Հայ Կաթողիկէ Աղքատախնամ Միութեանը:

Ան փաստաբանը եղած է Հայ Կաթողիկէ Պատրիարքութեան. ինչպէս նաեւ Հ.Յ.Դ. կուսակցութեան եւ բազմաթիւ վաճառականական ընկերութիւններու:

Միշտ լիբանանեան միութեան եւ անկախութեան կողմնակից եղած է եւ աշխատած է ընդդէմ  պետական եւ այլ վարչակազմերու փտածութեան դէմ:

Ան հայկական պլոքի անդամ եղած է:

Ամուսնացած էր Տիկ. Կրատցիելլա Քարամի հետ եւ ունի չորս զաւակներ՝ Ռիթա, Փօլ, Րաֆֆի եւ Սերժ: