Ուքրանական ուժերը տասնեակ բնակավայրերու վրայ վերահսկողութիւն հաստատած են
Ռուսական ուժերու Խերսոն քաղաքէն նահանջէն ետք, Ուքրանիոյ զինեալ ուժերը դարձեալ իրենց վերահսկողութեան տակ առած են շարք մը բնակավայրեր, որոնցմէ ամէնէն կարեւորը Նիքոլայեւսքի մարզին մէջ գտնուող Սնիկիրիովքա քաղաքն է, որ կը գտնուի Խերսոն մարզի վարչական սահմանին մօտ:
«Արմէնփրես»-ին համաձայն, վերջին մէկ օրուան ընթացքին ուքրանական բանակը իր վերահսկողութեան տակ առած է Խերսոնի եւ Նիքոլայեւսքի մարզերու 12 բնակավայրեր: Ուքրանիոյ զինեալ ուժերը կը հաղորդեն նախապէս գրաւուած տարածքներուն մէջ 7 քիլոմեթր յառաջանալու մասին:
Ռուսիոյ պաշտպանութեան նախարարութիւնը իր կարգին հաղորդեց, որ Քրասնի Լիմանի ուղղութեամբ ռուսական զօրքերը խափանած են Լուկանսքի ժողովրդական հանրապետութեան բնակավայրեր գրոհելու ուքրանական բանակի փորձերը:
Աղբիւրը՝ Ազդակ
Շնորհակալութիւն յօդուածը ընթերցելուն համար։ Եթէ կը փափաքիս թարմ լուրեր ստանալ կը հրաւիրենք բաժանորդագրուիլ մեր լրաթերթին` սեղմելով այստեղ
